OBITUARY : REVD. DR. CHUAUTHUAMA (77)
January 05, 2024 | OBITUARY
Revd. Dr. Chuauthuama (kum 77) pensioner chu January 4, 2024 (Ningani) zan dar 10:20 khan Heart Attack avangin Ebenezer Hospital-ah a thi a, January 5, 2024 (Zirtawpni) chawhnu dar 1 khan Ramhlun Vengchhak Kohhran Biak Inah Synod Moderator, Rev. R. Vanlalnghaka’n a vui.
Pian leh mûrna
Revd. Dr. Chuauthuamaa hi Upa Tawna leh Buaii te fa paruk zinga naupang ber a ni a, kum 1947 kângvâr laiin Bûkpui khuaah a piang a, a pian ni tak hi hriat a ni lo.
Kum 1947 February ni 15 khan Lalchhûmi nen Dawrpui Kohhran Biak Inah an in nei a. Kum 1984 May ni 5 khan fanu pakhat Elsa Lalramzauvi Pachuau an nei.
Zirna lam leh rawngbawlnaa a luh dan
Revd. Dr. Chuauthuama hian Primary leh Middle School chu an khua Bûkpui ah a zo a, High School chu Aizawl a Mizo High School-ah kum 1963 khan a lut tan a. Mizoram ram buai kum, kum 1966 khan zir zawm thei loin hlo a thlawhsan a. Kum 1967 January thlaah security force-in an man avangin Tezpur Jail-ah kum thum dawn lai a tân hnuin kum 1970 January thlaah a chhuak a. Kum 1970-ah khan Synod High School-ah Class X zirin, kum 1972 khan Matric a pass ta a. Kum 1976-ah Pachhunga College (Evening shift) atangin B.A (Distn)-ah a pass a; NEHU-ah pahnihna a ni.
Kum 1983 September thlaah Pathian thu zir turin United Theological College, Bangalore an pan a, B.D a zir a. B.D an zir chhung hian Hebrai leh Greek tawng a tuipui in a zir nasa hle a, Hebrai leh Greek course zawng zawng chu a la fai vek a ni.
B.D chu kum 1987-ah First Class First-ah a pass a. UTC-a Academic Prize awm zawng zawng chu a hui fai deuh vek a. Chu bakah chuan kum 1988 a Serampore Convocation, Vanapa Hall-a neihah khan Senator’s Prize for Highest Proficiency a dawng bawk.
Kum 1988-1990 chhung khan Cambridge Unversity-ah M.Phil (Old Testiment & Hebrew Language) a zuk zir a. M.Phil chu tha taka a zawh hnuah Jerusalem-a St. George College-ah ‘The Bible & Its Setting’ course a rawn zo leh bawk a; Palestina ram dung leh vang chipchiar takin a zir a ni. Kum 1988 khan Holland (Netherland) ramah ‘Reading The Bible from The Jewish Perspective’ course zirin thla khat a zuk kal leh a, a lo haw lamin Jerusalem-ah kar khat châm lehin Isua sulhnu uluk takin a zir leh a ni.
Cambridge University atanga a zir zawh hnu, kum 1990 khan Synod chuan Pro. Pastor atan a la ta a ni.
Rawngbawlna
Kum 1990 Synod Inkhawmpui Dawrpui Biak Ina neihah Pro. Pastor-a lak a ni a, Lungleiah dah a ni. Kum 1993 Synod Inkhawmpuiah nemngheh a ni a. Kum 1994 kum tir atangin kum 2007 kum tawp thlengin Aizawl Theological College-ah a thawk a, hemi kum Synod Inkhawmpui chuan pension-in a thlah ta a ni.
A pension hnu hian kum 2008 atangin Centenary School Dawrpuiah Principal hna a thawk a. Kum 2011 - 2015 khan Aizawl Theological College-ah M.Th (Old Testament) hawn a nih khan a thawk leh bawk.
Revd. Dr. Chuauthuama hi Synod hnuaiah kum 17 chauh a thawk hman a, chuti chung chuan Synod rawngbawlna kawngah hnu hma eng emaw zat a nei hman. A Rawngbawlnaa nihna leh dinhmun a chelh tawhte chu :
Pro Pastor, Lunglei Bial (1991-1993)
Lecturer Aizawl Theological College (1994- 2001)
Registrar ATC (2002-2007)
Synod Secretary Jr. (2000)
Synod Secretary Sr. (2001)
Synod Literature & Publication Board (1998- 2000)
Mizo Sunday School Union (2001-2003)
Presbyterian Publication Board (2004-2006)
Research & Evaluation Wing (2004- 2006, 2019-2021)
Synod Worship Committee (2007-2009, 2010-2012, 2013-2015)
PCI General Assembly Executive Committee (2001-2003, 2004-2006, 2006-2009)
Christian Home Committee (2001-2002)
Synod Social Front (2010-2012)
Synod Pastoral Committee (2013-2015, 2016-2018)
Synod Pension & Provident Fund Board (2013-2018)
MTC Governing Committee (2019-2021)
Synod Executive Committee (2019- Present)
Bible Society lamah a tangkai em em a, North East India Translation Advisory Committee-ah committee member lo ni reng tawh thin a ni a, hei bakah hian a thih ni thlengin Aizawl Auxiliary member a ni bawk. BSI Aizawl Auxiliary hnuaiah hian Chief Translator a ni mek a, Bible Mizo tawnga lehlin meka hotupa leh a titu ber chan chang a ni.
Ama pualin lehkhabu 58 a ziak tawh a, midang nena an thawh hona leh a telna lehkhabu leh booklet 17 tihchhuah a ni tawh bawk. Hei bakah hian chanchinbu - Journal leh Newspaper hrang hrangah article thahnem tak a tichhuak tawh a. Heng, thuziak lama a hnathawh that avang te, ram leh kohhran tana hna a thawh that em avangte hian Serampore College (University) chuan Doctor of Divinity (Honoris causa) chu kum 2023 December 4 khan a hlan a ni.
A nat dan
Revd. Dr. Chuauthuama hi pa invawng uluk deuh a ni a, Pathian zarah a hriselna pawh a tha ang reng hle thin a. A Service chhung hian earn leave vawi khat mah a la lo a. ATC-a thawh chhung pawhin Casual Leave ni nga chiah a la. Kum 2002 khan a khûp ruh a sawh chhiat avangin sick leave ni sawmli a la a, heng bak chu leave a la lo.
A pension hnu hian a mit lam a sawisel ve deuh a, chu bakah BP sang a nei ve ta deuh a; hemi tih loh chu insawiselna dang a nei em em lo. January ni 4, 2024 khan a BP sang avang hian Trinity Hospital-ah an inentir a, Heart Attack a lo nei tih hmuhchhuah a ni a, chuvangin Ebenezer Hospital-ah an refer a, Ebenezer Hospital-ah hian a dinhmun a tha lo a ni tih an hriat avangin ICCU-ah dah luh a ni a. Tha mai tura beisei a nih laiin hniam lam a pan a; CPR te nena enkawl zui a ni a, ventilator hmanga thawktir a ngai zui ta mai a. Doctor leh nurse ten an theihtawp an chhuah chungin rawng a bawlsak Lalpa hnenah January ni 4, 2024 zan dar 10:20 khan a kal ta a ni.
VUINA PROGRAMME
A hmun : Ramhlun Vengchhak Kohhran Biak In
A hun : 5.1.2024 dar 1:00 PM
Vuitu : Rev. R. Vanlalnghaka, Synod Moderator
Chanchin sawi : Rev. PB Mankima, Synod Secretary
Zaipawl : Ramhlun Pastor Bial Zaipawl
Thlamuanna thuchah : Rev. R. Vanlalnghaka, Synod Moderator
Tawngtaisaktu : Rev. C. Zorammawia, Senior Executive Secretary
Zaipawl : Ramhlun Vengchhak Kohhran Zaipawl
Hla sak ho : ‘Mi thianghlim kalna kawng hlui’ KHB No. 500
Malsawmna : Rev. V.L. Luaia Hranleh, Executive Secretary
Thlanmual
Hun hmangtu : Rev. Z.D. Lalhmachhuana, Bialtu Pastor
