OBITUARY : REV. T.ROSANGLIANA (40)
April 09, 2024 | OBITUARY
Rev. T.Rosangliana (kum 40), Haulawng Bialtu chu nimin (April 8, 2024) tlai dar 5:10 khan lungphu chawlin a boral a, vawiin (April 9, 2024) chawhnu dar 1:00 hian Synod Moderator Rev. R. Vanlalnghaka’n Khumtung Kohhran Biak Inah a vui ang.
Rev. T.Rosangliana hi Pu Lalrinmawia leh Pi C. Sawmzuali te fa pathum zinga a naupang ber niin February ni 11, 1984 khan Khumtungah lo piang a. Pianpui unau pahnih - hmeichhia pakhat leh mipa pakhat a nei.
Kum 2011 November ni 29 khan Vanlalchhuanawmi d/o HF Tlangthanzuala, Kolasib Diakkawn nen inneiin, fanu pathum leh fapa pakhat an nei.
An fate:
1. Rosa T. Vanlalhmangaihzuali, kum 12
2. Romi T. Vanlalrempuii, kum 10
3. Roel T. Vanromawia, kum 6
4. Ruthi T. Lalhriatchhungi, kum 4
Rawngbawlna lam
Rev. T.Rosangliana hi Khumtunga piang leh seilian a ni a, High School thlengin Khumtungah a zir a. Higher Secondary chu Govt. Central Higher Secondary School leh Chaltlang Higher Secondary-ah te kalin, HSSLC a zo va, Govt. Aizawl North College atangin B.A. a zo leh a ni. Kum 2005 atang khan Aizawl Theological College-ah Bachelor of Divinity a zir a, kum 2009 khan zir zovin, rawngbawlna lamah a lut ta a ni.
B.D. a zawh hnu hian, kum 2009 hian Disciple Society hnuaia Pathian thu zirna hmunah Lecturer hna a thawk a. Kum 2010 khan Synod Mission Board hnuaiah missionary-a chhuakin, Arunachal Pradesh-a Daporijo-ah rawng a bawl a. Missionary-a a thawh lai, kum 2010 hian Synod Inkhawmpui chuan Pro. Pastor turin a la.
Pastor rawngbawl hna a thawh chhunga a awm tawhnate:
1. 2011 (January)-2013 (December) : Pro Pastor, Bairabi Bial
2. 2014 (January)-2018 (December) : Phuaibuang Pastor Bial
3. 2019 (January)-2023(December) : Vanzau Pastor Bial
4. 2024 (January) atanga a thih ni thlengin : Haulawng Pastor Bial
Bial vawnga a awm chhung hian Presbytery Moderator te, Bial Chairman te a lo ni tawh thin a. Synod Executive Committee-ah term thum - kum 2014 atang khan, Tuivai Presbytery aiawhin kum 2018 thleng khan a awm a. Vanzau Biala a awm hnuah Tuipuiral Presbytery aiawhin kum 2019-2021 chhung khan SEC-ah hian a thu zui lehnghal a. Kum 2022 Synod-ah khan Synod Nomination Committee member a ni bawk.
A mizia
Rev. T. Rosangliana hi mi harh vâng pangngai, ramvah te pawh nuam ti tak thin, pa kawm nuam, ti ti thiam tak, rawngbawlna ngai pawimawh tak mi a ni. Mi kawm nêl a thiam a, a bulah hian tupawh an leng a ni ber mai a, mi tê leh mi lian pawhin an ngaina a. A awm tawhna bialah chuan tar leh naupang tê tê thlenga an ngainat a ni a; mi hlate hnuhhnaih a ngai pawimawh hle. Thusawi a thiam hle a, a thusawi pawh ngaihnawm an ti thin hle.
A nat dan
Pa hrisel pangngai tak a ni a, tunhnaiah pawh han insawiselna hranpa em em a nei hran lo. Hun eng emaw chen atang khan BP sang erawh a nei ve a, chu pawh han buaipui em em tham ni chiah lo a ni. Hun eng emaw ti lai deuh atang khan insawizawi nan badminton khelh a chîng chho ve tan a. April 8, 2024 (Thawhtanni) pawh khan tlai lamah Haulawng Hall-ah badminton an khel a. Set khat an khêl zo a thu chawl chu a zawi nghal hnawk a. A awm dan a dik loh avang hian a inkhelhpuite'n Haulawng PHC an panpui nghal thuai a, damdawi inah theihtawp chhuahin an enkawl a, amaherawhchu chhan theih a ni ta lo va. Chatuana Pa âng chhunga châwl turin April 8, 2024 tlai dar 5:10 khan a kal ta a ni.
VUINA PROGRAMME
A hmun : Khumtung Kohhran Biak In
A hun : April 9, 2024 chawhnu dar 1:00
Vuitu : Rev. R. Vanlalnghaka, Synod Moderator
Chanchin sawi : Rev. PB Mankima, Synod Secretary
Zaipawl : Baktawng Pastor Bial Zaipawl
Thlamuanna thuchah : Rev. R. Vanlalnghaka, Synod Moderator
Tawngtaisaktu : Rev. PC Pachhunga, Synod Finance Officer
Zaipawl : Khumtung Kohhran Zaipawl
Hla sak ho : ‘Lalpan a hmangaihte ram a buatsaih chu’ (KHB NO. 498)
Malsawmna : Rev. Dr.K.Lallawmzuala, Synod Executive Secretary
Thlanmual
Hun hmangtu : Pro Pastor Lalsawmkima, Baktawng Pastor Bial
