Pu R. Siamliana (58), Evangelist, Venghnuai Masihi Sangati Fellowship enkawl mektu chu nimin (April 10, 2024) khan Lunglenga a huanah a boral a, vawiin (April 11, 2024) chhun dar 12:00 hian Salem Mualpuiah vui a ni ang.
Pu R.Siamliana hi Upa R.Liankunga leh Pi Ngurlawmi (L) te fa 10 zînga pathumna a ni a. November 18, 1966 khân Lungkawlh khuaah a piang a. Pianpui unau mipa 6 leh hmeichhia 4 a nei.
A pianpui unaute chu :
1. Zakhumi (L), Chhinga Veng
2. D. Lalbiakmawia H/o C.Vanlalhumi, Model Veng, Aizawl
3. R. Siamliana H/o C.Lalhmangaihzuali (L), Salem Mualpui
4. Ngurthansiami (Missionary) W/o Sangkima, Chokihola, Karbi Anglong
5. R. Lalbiakkimi W/o Pachhunga (Mission Promoter, SMB, Synod Office)
6. Lalremmawii (L)
7. R. Lalremtluanga H/o C.Lalrinkimi, Farkawn
8. R. Lalremsiama H/o Lalmuanpuii, East Lungdar
9. Lianhluna Renthlei, Lawipu
10. R. Lalnunsiama H/o F. Darthangpuii, Keifang
Kum 2000 khân Pi C.Lalhmangaihzuali (Missionary) nên Bungkawn Kohhranah inneiin fa mipa pahnih an nei a. A nupui hian vânduaithlâk takin nikum January 29, 2023 khân a boralsan a; nikum vêk December 22, 2023 khân an fapa naupang zâwkin a boralsan bawk a ni.
An fate :
1) R. Ramdinpuia
2) R. Lalhruaitluanga (L)
Rawngbâwlna lam :
Pu R.Siamliana hi kum May 6, 1996-ah Bungkawn Kohhran atangin Synod Mission Board hnuaia Missionary tûra lâk niin, Karimganj, Barak Area (1996-2000)-ah a thawk a. Hemi hnu hian Bhairabkunda, Assam (2001-2008); Tlabung, Home Mission South (2009-2013); Zawlpui, Home Mission South (2014- 2015); Karbook, Tripura (2016-2018); Salem Boarding, Home Mission North (2019-2020) leh Pecharthal, Tripura (2021-June 2022)-ah te hian a thawk leh a. Tlabung, Zawlpui leh Pecharthalah te hian Headmaster hna a lo thawk tawh a ni.
Thiamna lamah chuan B.A, B.Ed a ni a, Mission rawngbâwlna hmun hrang hrangah thahnem a ngai theiin, a thawh hlâwk thîn hle a ni. A nupui, Pi C. Lalhmangaihzuali chu cancer, enkawl ngai a nih avângin Mission Board-in Pecharthal atangin Aizawl-ah Masihi Sangati Evangelist tûrin an nupain an dah a. Tûnah hian Venghnuai Masihi Sangati Fellowship a enkawl mêk a ni.
A mizia :
Pu R. Siamliana hi a têt tê atangin nu leh pa thu âwih thei tak niin, tûn thleng pawh hian û leh nau a zah thiamin a ngaina êm êm a, chhûngkaw hui khâwmtu ber a ni. Tleirawl sual nei lovin, a naupan lai atanga Kohhran bel tlat thîn mi a ni a. Rual pâwl a thiamin, a thiante pawhin an ngaina thîn hle.
A hun hnuhnung lam:
A nupuiin a thihsan atang hian a khua hi a har thei êm êm a. A nupui sûn atanga kum khat pawh tling lovah a fapa a sûn leh a. Hemi avâng hian a nun hi a khawhar zual êm êm a, zân mu mumal lova a awm châng a tam hle. Zunthlum a lo nei bawk nên, hetiang a nih avâng hian a û leh nau, chhûng te pawhin an ngaihsak thîn hle.
Lungleng ramah huan a nei a, thlai chi thlâka zan hnih riak tûrin, April ni 9, 2024 (Thawhlehni) tûkthuan ei kham khân a chhuak a. A riah luh ni chhûn lam pawh hian biak pawh a la ni a; nimin (April ni 10, 2024) chawhnu lamah phone a lâk theih tâk loh avângin a û leh naute inrâwnin an va ngaihven a. Thlâm an va thlen chuan chhan tlâk awm tawh lovin min lo kalsan ta a ni.
Vuina Programme :
A hmun : Salem Mualpui (CMR Building)
A hun : Ni 11 April, 2024 (Ningani) Dâr 12:00 Noon
Vuitu : Rev. Vanroluaha, Bialtu Pastor
Thusawi : A pa, Upa R. Liankunga (Chhûngkaw aiawh)
A chanchin sawi : Upa Lalthahluna Ralte, Coordinator, SMB
Hla sak ho : “Isua hmangaihna leh thatna” (KHB No. 495)
Thlan lama vuitu : Upa JL Hmingchhuanga, Bialtu Upa