Rev. Chalhnuna (pensioner) chu chuap cancer avangin vawiin (April 25, 2024) zing dar 8:45 khan a boral a, tlai dar 3:00 khan Mission Veng Kohhran Biak Inah Rev. R. Vanlalnghaka, Synod Moderator-in a vui a ni. 

Rev. Chalhnuna chanchin :
Rev. Chalhnuna hi 1939 August ni 15 khan Chawngtlai khuaah Upa Hausiama leh Hausangpuii te inkarah a lo piang a. Unau pasarih, hmeichhia 3 leh mipa 4 an ni. Kum 1963 January ni 7 khan Rizapthangi nen Sialsuk Presbyterian Kohhran Biak Inah Rev. J.M. Lloyd-an a inneihtir a. A nupui hi Primary zirtirtu a ni a, fanu leh fapa an nei a, tunu pakhat an nei bawk. 

An fate :
1. Laltleipuii w/o Zathangpuia, Mission Veng
2. Laldanglova h/o Vanlalhluni (L), Mission Veng

Zirna lam : An khua Chawngtlaiah hian Primary School a zo va, chumi hnuah 1954-ah Champhaia M.A.V. School-ah pawl ruk a zo leh a, Champhaia Gandhi Memorial High School-ah kal lehin kum li a zir hnuin Aizawlah a chhuk a, Morning School, Mission Vengah a lut leh a, chuta tang chuan kum 1964 khan matric a zo ve ta a ni.

Pathian kohna : Rev. Chalhnuna hian kum 1959 khan Pathianin a rawngbawl turin a ko niin a hria a; mahse a ngawih bosan a. Chumi hnuah 1962 khan Pathian thuin a nun a khawih nasa ta hle a. Pathianin rawngbawl turin a ko a ni tih a hre chiang tial tial a, Mission Veng Kohhran kaltlangin Pathian thu zir a dil a, Kum 1966 June thlaa Aizawl Theological College-a L.Th. zir turin lak a ni ve ta a ni. Tichuan, kum 1966 June thla atangin Pathian thu a zir ta a, kum 1969 April thlaah L.Th. chu a zir zova. Chumi hnuah Bial vawng chungin B.Th. chu a bei leh a, kum 1974-ah a zo ve leh a ni.

Rawngbawlna lam : Rev. Chalhnuna hian L.Th. a zir zawh hnu chuan kum 1969 Synod Inkhawmpui chuan Bilkhawthlir Pastor Bial thara thawka Vairengtea awm turin Pro. Pastor atan a la a. Kum 1972 Synod Inkhawmpui chuan Pastor atan a nemnghet a, Kawnpui Bialah kum 1973 atangin a awm a, Kum 1982 atangin Biate Bial a vawng a, kum 1991 atangin Champhai Kahrawt Bial a enkawl leh a, kum 2000 January thla khan pension-in a chhuak ta a ni.

Rawngbawlna kawng dang : Pastor hna a thawh chhung hian Rev. Chalhnuna hian Bial Chairman hna pawh a thawk zing hle. A thawh tan tirh lam deuhvah phei kha chuan Bial Chairman chu Pastor tih tura ngaiin an thawhtir deuh chawt a, a hun hnuhnung lamah erawh chuan Upate pawhin an thawk ve ta a ni. Presbyteryah erawh chuan vawi nga Moderator hna a thawk hman a ni. Synod Committee peng hrang hrang Synod Executive Committee (SEC), Pastoral Committee, Hospital Committee member-ah te a tang tawh.

Bible Society lamah pawh Champhai Branch-ah President leh Vice Preisident-a ni tawh a, khawtlang thilah pawh chanvo eng eng emaw a chelh ve nual tawh bawk. Pastor hna a thawh chhung hian nupa tuak 514 a inneihtir a, mi 3869 a Baptist bawk.

Rev. Chalhnuna hian Kohhran enkawl hi a ngaih pawimawh em em a ni. Amah hi mi nun zawi, nghet tak si, rawngbawltu rinawm tak, thu sawi ngaina tak mi a ni.

A nat dan : Rev. Chalhnuna hi mi hrisel tak natna pawh tawng ngai vak lo a ni a. Kum 85 a nih chhung hian vawi khat mah damdawiin a admit ngaiin a awm lova. Nimahsela kumin February ni 7 atang khan a hapui na in a tibuai a, Doctor te rawnin antibiotic te chawh a ni a. Chu chuan tlemin a tichau ve deuh a, a rilru leh ngaihtuahna lam pawh a tivai zeuh zeuh a. Investigation chi hrang hrang tih a nih hnuah chuap cancer a ni tih hmuhchhuah a ni a, a thluak lam thlengin a lo tai darh tawh tih hmuh a ni bawk a. Doctorte thurawn angin a taksa chak lo leh a kum a upat tawh avangin cancer treatment lak theih a ni lova, in lamah enkawl a ni a. April 23, zan dar 9 velah a thawhah chu nasa takin a zual a, theihtawpa enkawl a ni chungin April 25, zing dar 8:45 khan min lo chawlhsan ta a ni.

REV. CHALHNUNA VUINA PROGRAMME
A hmun : Mission Veng Kohhran Biak In 
A hun : April 25, 2024 chawhnu 3:00 P.M. 
Vuitu : Rev. R. Vanlalnghaka,Synod Moderator
Chanchin sawi : Rev. P.B. Mankima, Synod Secretary
Zaipawl : Mission Veng Kohhran Zaipawl    
Thlamuanna thuchah : Rev. R. Vanlalnghaka, Synod Moderator
Tawngtaisaktu : Rev. V.L. Luaia Hranleh, Executive Secretary
Hla sak ho : ‘Jordan lui kamah ka ding a’ KHB No : 475 
Malsawmna : Rev. C. Zorammawia, Senior Executive Secretary
Thlanmual Hun hmangtu : Rev. Vanlalmuanpuia Khiangte, Mission Veng Pastor Bial