Mizoram Synod, Family Guidance & Counselling Centre-in August 3, 2016 atanga Kohhran Hruaitute puala Pastoral Care & Counselling Training vawi 25-na, Synod Conference Centre-a a buatsaih chu August 16 (Thawhleh) zan khan khar a ni.
He Training-ah hian Thingtlang lam Pastor Bial 8 atangin mi 25 an tel a, Synod Moderator Rev. H. Lalrinmawia'n Training kharna hun hi a hmanpui a ni. Training kharna inkhawm hi Rev. PC Pachhunga, Executive Secretary i/c FG&CC in a kaihruai a, Rev. R. Lalhmingthanga, Director, FG&CC chuan inlawmna hun hmangin FG&CC rawngbawlna report tlangpui a pe. Training te aiawhin Upa Lalnithanga'n thu a sawi a, Mizoram Synod Choir-te zaiin, Rev. Lalneihvura, Principal, PBS chuan tawngtaisakna hun a hmang.
He hun hmanpuitu Synod Moderator, Rev. H. Lalrinmawia chuan training te hnenah Certificate hlanin thuchah a sawi. Moderator chuan, "Mizote hi a huhova inkawm nasa hnam kan nih avangin Counselling hna hi kan thawk reng a, chuvangin hetiang lama thiamna nei tura kan inzirchhuah zel hi a pawimawh a ni" tiin training chhuak tate chu tawngka mai ni lova, nungchang leh chetzia thlenga midangte entawntlaka nung tur leh mi dang tana malsawmna ni turin a fuih.
FG&CC Director report-a a lan danin, Pastoral Care & Counselling Training hi kum tin Pastor pual vawi khat leh Kohhran hruaitute pual tum hnih an buatsaih thin a. Pastor puala vawi 25 buatsaih tawhah Pastor 424 training pek an ni tawh a. Church Leader-te puala kum 2002 atanga vawi 25 neih tawhah mi 502 Training pek an ni tawh bawk. FG&CC hian tunah hian Centre 6 - Mission Veng, Chanmari, Vaivakawn, Champhai, Serchhip leh Kolasib-ah te an nei tawh a, pantu (client) mi 17,303 an nei tawh a ni.