Kohhran Hmeichhia :
May 4-5, 2024 chhung khan Mualpheng Pastor Bial Kohhran Hmeichhia chuan bial huapin Mualpheng Kohhranah Leadership training leh Kristian Chhungkaw Campaign programme an hmang a. Central Kohhran Hmeichhia atangin Pi Lalfakmawii, Gen.Secretary; Pi Rohmingthangi, Committee member; Pi Lalmalsawmi Sailo, Committee member leh Pi Lalnghakliani, Asst.Co-Ordinator ten he hun hi an hmanpui a ni.
May 4, 2024 (Inrinni) nilenga Leadership Training-a hun hman a nih hnuah Inrinni zan atangin Kristian Chhungkaw Campaign tan zui nghal a ni a. Inrinni zanah Pi Lalnghaklianin thu a sawi a, Pathianni chawhma inkhawmah Pi Rohmingthangi, chawhnuah Pi Lalmalsawmi Sailo leh Pathianni zan inkhawmah Pi Lalfakmawii ten thu an sawi a ni.
MSSU :
May 4, 2024 (Inrinni) khan Sunday School zirtirtu training hmun hrang hrangah neih a ni a, Hnahlan Bialah Upa B. Lalhmunliana leh Upa H. Lalnghinglova, trainer-te an kal a. Tlangnuam Vengthlang Kohhranah Upa Lalthanchhunga, Upa V. Lalrindika leh Upa Danny Lalremmawia te an kal a, Guwahati Bialah Upa Hrilthansanga leh Upa C. Lalbiaksanga te an kal bawk.
Kristian Thalai Pawl :
May 1-5, 2024 chhunga PCI Biennial General Assembly, Chaltlang Kohhrana neih zawh takah PYF (Central KTP) aiawhin Upa Lalmuanpuia, General Secretary; Pu C. Hmingthanzauva, Committee member; T. Upa Laltlanthanga, Committee member; Pu Lalrambuatsaiha, Committee member leh Pu K. Vanlalremruata, Committee member te an kal a. Anni bakah hian CKTP Leader, Rev. Rosiamliana Tochhawng (palai ni sa); Nl. F. Lallianzuali, CKTP Committee member (PYF Asst. Secy) leh Pu C. Lalkhawngaiha, CKTP Asst. Secy (PYF Committee member) te chu palai an nih angin an tel bawk.
Prison Ministry :
Synod Prison Ministry Committee chuan May 7, 2024 (Thawhlehni) khan Chite Venga 'Khawngaihna In' an tlawh a. Prison Ministry leh Khawngaihna In thawh ho dan tur chungchang sawiin hlim takin an inkawm ho va. Synod Prison Ministry hmalakna te Rev. Lalhmuchhuaka, Prison Ministry Director-in a sawi a. Tlai lamah zanrih an ei ho nghal a ni.
Prison Ministry hi Rev. Dr. K. Lallawmzuala, Executive Secretary hovin an kal a, Khawngaihna In Home Father, Pu Lalramnghinglova leh Rev. Lalrinmawia, Director/Secretary te leh an thawhpuiten an lo dawngsawng a ni.
