Vawiin (May 10, 2024) chawhma dar 10:00 khan J.M. Lloyd Hall, Synod Office-ah Presbyterian Communications Board an thu a. Board thut khawm vawi 179-na hi Rev. R. Vanlalnghaka, Synod Moderator-in a kaihruai a, hming lam a nih hnuah Upa H. Ronghaka, Board Secretary hnen atangin report ngaihthlak a ni.
Secretary report-ah hian PRESCOM sum audit zawh fel a nih thu te, meeting leh meeting inkarah Synod Press-in lehkhabu 95 an chhut thu te, Synod Inkhawmpui leh KTP General Conference-ah Bookroom dawr hawn a nih thu te, Synod Bookroom bungraw hralh zat leh stock awm zat hriat zung zung theihna tur application software 'Gobill' siam a nih thu te, kum 2024 Puitling Sunday School zirlai bu leh Nilai leh Beihrual thupui bu tum thum lai chhut belh a nih tawh thu te chu a langsar zual a ni.
Board thut khawma ngaihtuah tur hian Literature campaign neihpui tura sawmna te, Chartered Accountant rawih chhunzawm thu te, Synod Bookroom Branch hawn dilna te, Daily-a inrawihna rate kalpui zel dan tur chungchang te chhawp chhuah a ni.
May thla hi Synod Board leh Committee hrang hrangte thut khawm hun a ni a. Synod Mission Board, Hospital Board, Pastoral Committee leh Social Front Committee an thu tawh a. Kar lehah Synod Finance Committee an thu ve leh thung dawn a ni.