Nizan (May 13, 2024) khan Family Guidance & Counselling Centre (FG&CC)-in May 6, 2024 atanga Pastoral Care & Counselling Training vawi 38-na an buatsaih kharna, Pi Zaii Hall, Synod Conference Centre-ah neih a ni.
Tun tumah hian Bial 8 - Vanzau, Farkawn, Khawngbung Vengpui, Siaha, Hnahlan, Tualcheng, Lungsen leh Khuangleng atangin Kohhran hruaitu 35 koh niin 32 an tel thei a ni.
Rev. Lalthangpuia Fanai, Director, FG&CC-in Graduation Service hi a kaihruai a, Inlawmna leh inhmelhriattirna Rev Lalsangberan a nei a. Rev. Dr. R. Vanlaltluanga, Resource Person-in Final Evaluation a tihpui a. Rev. V.L. Luaia Hranleh, Executive Secretary-in Certificate a sem zawhin thuchah a sawi. Trainee-te hian an hlawkpui dan a lema an ziak chu entirin an hrilhfiah a, trainee-te aiawhin Upa F. Lalvulluaian thu tawi a sawi a, Ramhlun Vengthar Bial an zai bawk. Trainee-te tana tawngtaisakna hun Upa Lalbiakmawia Khiangte, Committee Member-in a hmang a ni.
Synod hian Counselling Centre 9 - Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah te a nei a. Heng Counselling Centre pakuaah hian April 29, 2024 thlenga pantu (client) an neih tawh zat chu 61,924 a ni a, kumin 2024 bikah mi 1,967 an nei tawh a ni.
FG&CC hian Pastor leh Kohhran hruaitute puala Counselling Training a buatsaih thin bakah Kohhran mal, Bial huap, Presbytery huap leh District khawpuiah te Kristian Chhungkaw Seminar, Campaign leh Counselling Awareness Campaign te a neih thin bawk.
