PRAISE ON Audition Round thawh 2-na chu vawiin (Aug. 16, 2016) hian Kolasib Zone, Serchhip Zone leh Mamit Zone Audition Round chu neih a ni. Kolasib Zone hian Diakkawn Kohhran Hall-ah zing dar 10 khan tanin Bialtu Pastor, Rev. R. Lalremruata'n tawngtaina hun a hmang a, intihsiakna tan nghal a ni. Rothangmawia, Vairengte chu a zai hmasa ber a, fakna hlasatu zinga naupang ber chu Lalnunhlimi d/o Lalzawmliana (DoB April 26, 2001) a ni.
Kolasib Zone-a endiktu (judge) te chu -
1) Upa H. Lalhuapliana, Kolasib Diakkawn
2) C. Vanlalhruaia, Kolasib Venglai
3) Tv. Chris MS Dawngkima, Aizawl Ramhlun North te an ni a, Organising Committee lam atangin Upa C. Lalremsiama, Aizawl Venglai leh Pu David Lalvensanga, Khatla te an kal bawk.
Serchhip Zone-in Serchhip Kawnpui Senior Department Hall-ah zing dar 10 khan tanin Bialtu Pastor, Rev. H. Lallianzara'n hlanna hun a hmang a, fakna hunin a zui nghal a. Lalchhuanawma, Chhiahtlang Kawn Veng a zai hmasa ber a, fak hla satu zingah hian C. Lalhruaisangi, Serchhip Dinthar Branch, kum 17 a naupang ber.
Serchhipa endiktu (judge) te chu -
1) Upa H. Lalmuanpuia, New Serchhip
2) Pu Robert Zohmingthanga, Serchhip Kawnpui
3) Pu David Lalnunzira, Aizawl Armed Vengte an ni a, Organising Committee lam atangin Pu P.B. Lalbiakzuala, Aizawl Armed Veng leh Tv. Peter Lalanpuia, Aizawl Muanna Veng te an kal bawk.
Mamit Zone hian Mamit Kohhran Sunday School Hall ‘Fakzai Studio’-ah chawhma dar 11 khan tanin Synfo Commiittee Member Rev. Rualthankhuma, Khatla Bialtu Pastor chuan Inhmelhriattirna leh Praise On chungchang a sawi a. Mamit Bialtu Pastor V. Lalkima'n tawngtaina hun a hmang a, fakna hunin a zui nghal. Benjamin Lalremruata, Mamit a zai hmasa ber thung a, hemi zone-a naupang ber chu Lalramdinpuia, Dampui (DoB December 23, 2001) a ni.
Mamit Zone endiktu (judge) te chu -
1) Upa K. Lalrinmawia, Lungsir
2) Tv. C. Lalchhanhima, Mamit
3) Nl. Vanlalhruaii, Aizawl Republic Vengthlangte an ni a, Organising Committee lam atangin Rev. Rualthankhuma, i/c Khatla Pastor Bial leh Pu R. Lalnuntuanga, Mission Vengthlang/Coordinator, SYNFO te an kal bawk.
PRAISE ON thawh 1-na hi kar hmasa August 12, 2016 (Zirtawpni) khan tluang takin Champhai Zone leh Lunglei Zone-ah te neih a ni tawh a, Pathian hruainain tlin takin Champhai Vengthlang Branch KTP leh Lunglei Chanmari Branch KTP ten an lo thleng tawh a ni.
PRAISE ON Audition Round thawh 3-na Aizawl Zone hi KTP Branch lian ber pahnih Mission Veng Branch KTP leh Chanmari Branch KTP te'n an thleng ve leh dawn a, Mission Veng-ah hian August 19&20, 2016-ah neih a ni ang a, Chanmari-ah hian August 22, 23&24, 2016-ah te neih a ni ve leh thung ang. Aizawl Zone-a zai tur hi an thathnem deuh avangin zai dan tur pawh Vanglaini Chanchinbu vawiin (August 16, 2016) chhuakah tarlan a ni.
'Praise On' show hi Pathian faka zaia rawngbawlna kawnga hmasawnna atan leh kohhran programme hrang hranga thinlung taka Pathian faka zai thei an lo pun zel theih nan Mizoram chhunga KTP Branch tin te Solo intihsiakna atana buatsaih a ni a, tel tur mi 750 velin hming an thehlut a ni.
‘Praise On’ hi Synod Information & Publicity Department (Synfo) leh Inkspot Digiprint Solutions (Main Sponsor) leh Co-Sponsor : Hlunbuang Store, MD&D Enterprise, Trade Centre leh CL Paper te tangkawpin an buatsaih a ni a. Lawmman atan pakhatna - Rs. 80,000/-, pahnihna - Rs. 40,000/-, pathumna - Rs. 20,000/- leh Top 10 tling chin tan Consolation Prize - Rs. 5,000/- theuh pek an ni ang. Music Home, Chanmari ten pakhatna atanga pathumna te hi Keyboard an pe ang a, an Branch tan microphone an pe dawn bawk. Top 3 te hi Synfo lamin a free in Music Video an siam sak bawk ang. Heng bakah hian Special Award siam tum a ni bawk.