Mizoram Synod, Family Guidance & Counselling Centre-in Chanmari-a Counselling Centre an neih chu remchan zawkna avangin Bawngkawnah an sawn a. Bawngkawna Counselling Centre sawn tak hi Rev. P.C. Pachhunga, Executive Secretary i/c FG&CC chuan nimin (Sept. 27, 2016) khan Pathian hnenah a hlan.
Bawngkawna Counselling Centre hi Bawngkawn kawn lai tak, Pastor Quarters hlui, tuna Bawngkawn Bethel Bialtu Pastorin a luah tak chungah siam a ni a. Hlanna hun hmangtu Rev. PC Pachhunga chuan, kan ram mamawhna sang zelah Counselling chu a pawimawh tulh tulh dawn a ni tih sawiin, Aizawl hmar lama awmte tan, Kohhran bik pawh sawi lova, mi tinin Centre chu hmang tangkai thei se a duh thu a sawi. Bawngkawn-a Centre hlannaah hian Rev. R. Lalhmingthanga, Director FG&CC chuan report a pe a. Kum 2009 May thla khan Chanmari-ah hian Counselling Centre hi hawn a ni a, a hawn tirh atanga client an neih zawng zawng chu mi 3205 an ni. Chanmari-a an building luah lai chu luah chhunzawm a remchan tak loh avangin Bawngkawnah hian SEC chuan sawn a rel ta a ni tih a sawi bawk.