Vawiin (May 30, 2024) khan Pi Zaii Hall, Synod Conference Centre-ah Synod Bookroom Conference 2024 hman a ni a, Mizoram puma Synod Bookroom zawng zawng pawh hemi ni hian khar a ni.
Conference hi zing dar 9:30-ah tan a ni a. Pu Malsawmdawngliana, Supervisor, Synod Bookroom chuan chawhma hun kaihruaiin inlawmna thu a sawi a. Pi Rosy Lalhmingmawii, Accountant-in Bookroom sum dinhmun report a pe a ni. Report atanga a lan danin kum kalta khan Synod Bookroom hian nasa takin hma a sawn belh a. An Budget Rs. 15,77,00,000/- chu tha taka khumin Rs. 24,61,77,315/- zet thawh chhuah a ni a, kum 1911-a Synod Bookroom din a nih atanga kum khata an thawh chhuah tam ber tum a la ni. Budget khumna hi Rs. 8,84,77,315/- niin kum kal ta chhung khan kum hmasa lama an thawh chhuah pawh Rs. 2,64,49,501/- laia an khum thu tarlan a ni bawk. Pathian awmpuina leh Kohhran mipuite thahnemngaihna azara hetiang dinhmun an thleng thei hi Synod Bookroom chuan lawmthu an sawi a ni.
Chawhma hunah vek hian Upa H. Ronghaka, General Manager, PRESCOM chuan kum hmasa Bookroom Conference-a thurelte bawhzui a nih dan leh tihhlawhtlin a nih dan chi hrang hrang report a pe bawk.
Chawhnu lam hun hi Upa H. Ronghaka, Genereral Manager-in a kaihruai a, Mizoram puma Branch hrang hrangte atangin report leh rawtnate ngaihthlak a ni a. Kum kaltaa Bookroom rawngbawlna hrang hrang thlirletna leh sawizauna neih a ni. Hemi hnu hian Pu Lalniliana Manager, Synod Bookroom-in Monthly Operation Review khai khawmna a nei a. Operation review-a a lan danin 2023-24 kha Synod Bookroom Branch tam ber tan Sale tam ber kum a nih thu leh nikumah Synod Bookroom Branch-ten an budget an khum that thu tarlan a ni.
Synod Bookroom Branch tha thlante hnenah Rev. V.L. Luaia Hranleh, Executive Secretary chuan Branch lawmman a sem a. Kum 2023-24 chhunga Synod Bookroom Branch tha thlan chhuahte chu -
Pakhatna : Synod Bookroom Headquarters Showroom, Aizawl
Pahnihna : Synod Bookroom Zemabawk North Branch, Aizawl
Pathumna : Synod Bookroom Chanmari Branch, Aizawl
Tun dinhmunah Synod Bookroom hian Branch 16 neiin Distribution Centre 45 a awm mek a ni.