May 29, 2024 (Nilaini) khan Mizoram Christian College chuan Synod Conference Centre, Mission Vengah Graduation Day vawi 2-na an hmang.
He hun hi Ramnunmawia Pachuau leh Dr. Gloria Laldinmawiiten kaihruaiin, Dr. Tawnenga, Principal chuan kalkhawmte lawmna leh zirlaite hnena thuchah a sawi a. Zirlaite chu an nun kal zelah an awmna hmun chu Pathianin a kohna hmun a ni tih hria a, chumi rilru pua hna thawk turin a chah a, mahni inzah thei tur khawpa mi dik leh rinawm ni tur te, Mizorama kan hlawhchhamna lian ber khawi hmunah pawh dan zawm mi ni tur te, Pathian rinchhan tlat chunga hma lam pan zel tur leh, kohhran leh khawtlang tana mi tangkai ni zel turin a chah bawk.
Kal chhuak turte thlahna thuchah sawitu Rev. V. L. Luaia Hranleh, Synod Executive Secretary pawhin zirlaite chu Issac Newton leh Samdala khan thil inthlau lo tak tawng chunga an hmachhawn dan avanga an danglamzia hre reng tura fuihin, he khawvelah hian ti tha peih lote tan dam khawchhuahna a van tial tial thu a sawi. Central Service thlenga hmachhawn ngam tura taima tur leh sorkar hna ngawta innghat lo a mahni inhaikaw thei tura intuaihriam turin a chah a. Hlawhtlinna an umna kawngah a tawp tha taka hlen chhuah a pawimawh thu a sawiin, zirlaite chu 3D : Devotion (Pathian nena nun inserhhranna), Duty ( Mawhphurhna chanpual tha taka hlen chhuah), Displine (Thununna hnuaia awm theihna leh mahni inthunun theihna) vawng tlat chunga hma lam pan zel turin a chah. Zirtirtute aiawhin Dr. L.V. Lalrintluangin thu a sawi bawk. Rev. Dr. K. Lallawmzuala, Synod Executive Secretary-in tawngtainain Mizoram Christian College Graduation Day vawi hnihna hi a khar a ni.
He hunah hian Synod Puipate, Department Head, Mizoram Christian College Governing Board member bakah Alumni hruaituten an hmanpui a. One In Christ leh Israel-a Pachuau ten zaiin kal khawmte an awi bawk.
For more Pics Click Here