May 31, 2024 (Zirtawpni) chawhnu dar 2:00 khan Presbyterian English School (PES) hnuaia HSLC result tha lawmna, J.M. Lloyd Hall, Synod Office-ah neih a ni.
Programme hi Pu Lalsiammawia Fanai, Secretary, Synod Education Board-in a kaihruai a, Pu P.C. Vanlalhruaia, Supervisor of Schools-in inhmelhriattirna leh report a pe a. Synod Moderator Rev. R. Vanlalnghakan thu sawiin mimal ti thate hnenah lawmman a sem a, Rev. Dr. K. Lallawmzuala, Executive Secretary i/c Education-in thu sawiin School ti thate hnenah lawmman a sem bawk, Upa Dr. Laithanzauva, Synod Education Board Member-in lawmthu sawina hun a hmang a, Rev. R. Lalchanglianan malsawmnain hun a khar a, he hunah hian Nl. Christina Vanlalnghaki a zai bawk.
Zirlai ti thate chawimawina hunah hian Distinction-a pass mi 59-te hnenah lawmpuina Rs.10,000/- (Singkhat) leh Citation hlan an ni. PES zirlai zinga HSLC result-a Top 3 te tan Special Award siam a ni a, lawmman dawngtute chu :
1. Freddy H. Ramdikmawia S/o Lalduhmawia, Zemabawk North PES
2. Lalrinhlui D/o Lalsangpuia, Sihpir Venglai PES
3. Frankie Lalruatsanga S/o Vanlalpeka, Zemabawk North PES
Heng bakah hian School ti tha pathumte hnenah lawmman pek an nih bakah pass kim vek School pasarih hnenah Rs. 10,000/- theuh Consolation Prize pek an ni bawk.
Tun dinhmunah Presbyterian English School (PES) hnuaiah hian School 168 an awm mek a, chung zinga school 38 chuan HSLC candidate an nei a. Exam beitu zawng zawng hi zirlai 875 niin 782-in an pass a. Distinction-ah 59, First Division-ah 297, Second Division-ah 367, Third Division-ah 59 an ni a, a pumpui Pass Percentage hi 89.37% a ni.