June 4-6, 2024 chhung hian Synod Executive Committee vawi 307-na chu JM Lloyd Hall, Synod Office-ah an thu khawm mek a. Meeting hi Moderator, Rev. R. Vanlalnghakan a kaihruai a, Rev. P.B. Mankima, Synod Secretary hnen atangin report ngaihthlak a ni a, Rev. V.L. Luaia Hranleh, Finance Officer-in report a pe bawk.
Secretary report-ah hian April 26-28, 2024 chhunga Bial hrang hrangten Bial Inkhawmpui tluang taka neih a nih thu te, May 1-5, 2024 chhunga Chaltlang Kohhran Biak Ina PCI General Assembly vawi 45-na thlen a nih thu te, SEC-in a lo rel tawh anga Hmuntha leh Maite inkar kawng siam tha tura sawrkara thlen a nih thu te, Inkhawmpui hrang hrangah Synod aiawha palai intirh a nih thu te, February leh June SEC thut inkarah RC 214 leh RL 290 pek chhuah a nih thu te ngaihthlak a ni.
Finance Officer report-ah Synod sum dinhmun ngaihthlak a ni a. April 2023-March 2024 chhunga Synod sum hmuh zawng zawng chu Rs. 3,95,07,74,653 a ni a, Pastoral-ah Rs. 2,21,49,26,750 hmuh a ni a, Mission(Ramthar)-ah Rs. 1,73,58,47,903 hmuh a ni thung. Tangka kum kal ta chhunga Synod sum hman zawng zawng chu Rs. 3,96,65,83,734 a ni a, Pastoral-ah Rs. 2,44,13,97,979 hman a ni a, Mission(Ramthar)-ah 1,52,51,85,755 hman a ni. Hmuhna lamah hian kum hmasa khumna Rs. 22,34,98,245 a ni a, hmanna lama kum hmasa khumna Rs. 89,20,03,334 a ni thung. Tangka kum kal ta chhung khan Bial hrang hrang thawhlawm thehluh atanga hmuh zat chu Rs. 3,69,67,61,527 a ni a, hmuhna dang atangin Rs. 25,40,13,126 hmuh a ni.
Tun tum SEC thut khawmah hian agenda 80 chuang chhawp chhuah a ni a. Chung zingah chuan - Fa lak (adoption) chungchanga inzirtirna siam rawtna te, Contract leh Daily rate en that rawtna te, Pem Upa thlan nawnte Certificate pek rawtna te, Kohhran hming thlak dilna te, Central KTP hruaitu thlan dan chungchang te, Mizo Kutpui kan hman thin tha zawka hman rawtna te, Synod Hospital kum 100 tlin lawm dilna te, Assam Mission Field then chungchang te, Synod pem hruaina 2017 en that chungchang te, PRESCOM leh Synod Hospital dinhmun en that chungchang te a tel a ni.
He thut khawmah hian June 5, 2024 (Nilaini) chawhma dar 11:00-ah Mizoram MLA-te nena inkawm hona hun neih a ni dawn a. Tunhma atangin MLA thlan tharte hi Synod Executive Committee te nen an inkawm ho thin a. Inpawh tawn takin lawmpuina leh rawtna te, sawrkar thara beiseina te SEC hian an lo thlen thin a ni. February thla SEC thut khawma inkawm ho tura ruahman a ni zet a, Assembly Session nen a innan avangin a hun sawnin June thla SEC thut khawmah hian inkawm ho a ni dawn ta a ni.