Vawiin (June 5, 2024) chawhma dar 11:00 khan Mizoram MLA-te leh Synod Executive Member-te chuan J.M. Lloyd Hall, Synod Office-ah an inkawm hona hun an hmang.
He inkawm hona hi Synod Moderator, Rev. R. Vanlalnghakan a kaihruai a, inlawmna leh inhmelhriattirna neih zui a ni. Rev. C. Zorammawia, Senior Exe. Secretary-in SEC lam inhmelhriattirna a neih zawhin Pu Lalfamkima, Deputy Speaker-in MLA lam inhmelhriattirna a nei zui ve leh a ni. Synod Moderator-in MLA zawng zawngte hnena Synod aiawha Holy Bible a hlan hnuin thusawiin a zui a. Synod aiawhin Rev. P.B. Mankima, Synod Secretary-in MLA-te lawmna leh sawrkar thar hnena ngenna thuchah a chhiar chhuak a. Pu Lalduhoma, Chief Minister leh Pu Lalbiakzama, Speaker ten thu an sawi zui a. Anni bakah Pu Lalchhandama, Opposition Leader; Pu Ngunlianchunga, MLA leh Pu B. Lalchhanzova, Minister-ten thu an sawi ve bawk a ni. Sawrkar tana tawngtaisakna hun Rev. C. Lalsanglianan a hman zawhah Rev. V.L. Luaia Hranleh, Executive Secretary, Mizoram Synod-in lawm thu a sawi zawhin Rev. P.C. Pachhunga, Finance Officer-in malsawmna a sawi.
Kum 1978 atang khan Synod Executive Committee leh MLA thlan thar apiangte nena inkawm hona hun hi sawrkar thar a pian hnua SEC thut hmasak berah buatsaih thin a ni a. Kuminah erawh chuan February SEC thut hun leh Assembly Session a innan avangin June thla SEC thut khawmah hian he inkawm hona hun hi hman a ni ta a ni. Tun tum inkawm hoah hian MLA 30 an kal thei a ni.
For more pics Click Here