Vawiin (June 7, 2024) khan Synod Bookroom Distributor Meet 2024 chu Synod Conference Center-ah hman a ni a. Meet hi chawhma dar 10:00-ah Pu Vanlaltirha, Stock Supervisor, Synod Bookroom chuan hawngin inlawmna thu a sawi.
Chawhma hunah Pu Lalniliana, Manager, Synod Bookroom chuan Bookroom Distributor bikte sum dinhmun report a pe a. Financial Year kal ta (2023-24) chhung khan Synod Bookroom hnuaia Distributor 46-te budget chu Rs. 1,74,00,000 a nih laiin Rs. 3,57,45,896 lai an thawh chhuah thu leh budget khumna pawh Rs. 1,83,45,896 a nih thu a sawi. Financial Year hmasaa Distributor bikte thawh chhuah khumna pawh Rs. 46,13,861 a nih thu a sawi bawk. Hetiang dinhmun an thleng thei hi Pathian malsawmna leh Distributor tinte thahnemngaih vang a ni tih sawiin, Pathian leh Distributor tinte chungah Headquarters hmingin lawmthu a sawi.
Chawhnu lamah Upa H. Ronghaka, General Manager chuan Meet kaihruaiin Mizoram puma Distributor hrang hrangte atangin report leh rawtnate ngaihthlak a ni a. Kum kal taa Bookroom rawngbawlna hrang hrang thlir letna leh sawi zauna neih a ni bawk.
Hemi hnu hian kum kal taa Synod Bookroom Distributor tha thlanna result puan a ni a, Upa H. Ronghaka, General Manager, PRESCOM chuan Distributor ti thate hnenah lawmman a sem a. Kum 2023-24 chhunga Synod Bookroom Distributor intehna result chu -
Pakhatna : Synod Bookroom Darlawn Distributor
Pahnihna : Synod Bookroom Sairang Distributor
Pathumna : Synod Bookroom Khawhai Distributor
Tun dinhmunah Synod Bookroom hian Distribution Centre 45 a nei mek a ni.