June 11, 2024 (Thawhlehni) khan J.M. Lloyd Hall, Synod Office-ah Mizoram Kohhrante Inpumkhatna Joint Committee chu an thu khawm a. He Meeting-ah hian Kohhran hrang hrang paruk - Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran (Ng) aiawhte an thu khawm a ni.
Meeting hi Rev. R. Vanlalnghaka, Synod Moderator-in a kaihruai a, Secretary hnen atangin report ngaihthlak a ni. Secretary report-ah hian May 6, 2024 (Thawhtani)-a BCM Headquarters Office-a Drafting Committee thut khawm a nih thu te, May 2, 2024-ah Kohhran dang hruaitute kawmna hun hman a nih thu te, Church Council of Mizoram hruaitu turte dawn a nih tawh thu te a tel.
Meeting-a thu ngaihtuah tur chhawp chhuah zingah Council of Churches in Mizoram (CCM) Constitution ruahmanna chungchang te, Council of Churches in Mizoram hawnna programme ruahman chungchang te, CCM Interim Budget ruahmanna te, CCM Office hawn chungchang te, kohhran pawl dang atanga member nih dilna te a tel a ni.
Council of Churches in Mizoram a pian theihna tura Joint Meeting hmasa ber chu January 24, 2023 khan BCM Headquarters-ah neih a ni a. He inhmuhkhawmah hian Drafting Committee din a ni. Drafting Committee ruahmanna chu May 19, 2023-ah Booth Manson Hall, Salvation Army Headquarters-ah en ho a ni a. Drafting Committee ruahmanna chu pawmin mahni kohhran rorelna sangah ngaihtuah tura thlen leh theuh a ni a. Hemi hnu hian April 3, 2024-ah JM Lloyd Hall, Synod Office-ah Joint Meeting hi neih leh a ni a. CCM danpui lo duang turin Drafting Committee ruat a ni.
Church Council in Mizoram din hun atan October 27, 2024 ruat a ni a. CCM hruaitu turin chanvo hetiang hian insiamrem a ni tawh a, Kohhran tinin Office Bearer tura an ruatte pawh Joint Meeting chuan a pawm a, October 26, 2024-a CCM Rorel Inkhawmah hei hi pawm tura chhawp chhuah a ni ang.
President - Rev. R. Lalbiakliana, (BCM)
Vice Presidents - a) Rev. B. Zazawna (LIKBK)
b) Rev. Lalrodinpuia L.S. Nghaling (IKK Bualpui Ng)
General Secretary (Full time) - Rev. Dr. Lalhmangaiha (MPC)
Joint Secretary - Rev. T. Salaw (ECM)
Treasurer - Upa R. Lalmalsawma (MPC)
Finance Secretary - Rev. Jessai L. Neitham (EFCI)
For more Pics Click Here