June 11, 2024 (Thawhlehni) zan khan Vanapa Hall-ah India Missions Association (IMA) inkhawmpui lian Global Mission Summit (GMS)2024 hawnna inkhawm (Inaugural Session) chu hman a ni a, Mizoram Chief Minister, Upa Lalduhoma chu khuallian a ni. GMS hi June 11-14, 2024 chhung hian Zarkawt Kohhran Biak Inah neih a ni mek a ni.

GMS hawnna inkhawmah hian Rev. R. Vanlalnghaka, Synod Moderator-in hunserh a hmang a. Rev. Dr. K. Lallawmzuala, Executive Secretary-in inlawmna leh inhmelhriattirna a nei a. Rev. Andrew Semp, IMA Chairman-in chibai bukna thu a sawi zawhah Chief Guest, Pu Lalduhoma, Chief Minister-in Keynote Address a sawi. Hemi hnu hian IMA General Secretary, Rev. Isac S. Raja-in thu a sawi a. Rev. R. Lalhmingsanga, Synod Mission Board Secretary-in lawm thu a sawi hnuin Rev. C. Zorammawia, Senior Executive Secretary-in malsawmnain Inaugural Session hi a tin a ni. Inkhawm kar lakah hian zaipawl pali - Synod Mission Choir, The Leprosy Mission Choir, TBZ Choir leh Aizawl Area Baptist Choir te an zai a. Art & Culture Department Cultural Troupe-in Mizo hnam lam chi thum - Khual lam, Cheraw leh Chheih lam hmuhnawm tak an entir bawk a ni. GMS Inaugural Session hi Hruaina Eng TV leh Synod Information YouTube Channel-ah live-a pek chhuah a ni.

GMS hawnna inkhawmah hian IMA palaite bakah Aizawl chhunga Bial hrang hrang aiawhte leh ATC, MTC, AICS Faculty leh sawm bik mi eng emaw zatte nen mi 400 chuang an pung khawm thei a ni.

India Missions Association hi kum 1977-a din a ni a. India rama mission pawl hrang hrangte a tul leh mamawh dan ang zela intichak leh intanpui tawn tura Pathian ram zau nana thawk ho tura din a ni. Kuminah hian IMA inkhawmpui lian (GMS) thlen hna hi Mizoram Presbyterian Kohhran koah a tla a. Synod aiawhin Synod Mission Board-in IMA inkhawmpui hi Zarkawt Kohhranah a thleng ta a ni.

Synod-in he IMA inkhawmpui hi hlawhtling taka a thlen theih nan ruahmanna siamtu, Hospitality Sub-Committee din a ni a, member-te chu -
Chairman - Rev. R. Lalhmingsanga, SMB Secretary
Secretary - Upa Lalthahluna Ralte, SMB Co-ordinator 
Member-te :
1. Upa Rochungnunga, Superintendent 
2. Pu John Lalhruaitluanga, SYNFO Co-ordinator
3. Rev. Z. John Colney, Partnership Secretary
4. Pu K. Lallianzuala, SMB Office
5. Pu K. Laldawngliana, SMB Office 
6. Upa Lalzamliana, Zarkawt Kohhran aiawh
7. Upa Ngurnunsanga, Zarkawt Kohhran aiawh

For more Pics Click Here