June 14, 2024 (Zirtawpni) chawhnu dar 2:00 khan Presbyterian Hindi Bible School (PHBS) te chuan Laipuitlang Kohhran Hall-ah Graduation Day vawi 72-na an hmang a, tun tumah hian zirlai 29-in tha takin an zirchhuak a ni.
Inkhawm hi Rev. R. Lalrinsanga, Principal-in a kaihruai a, inlawmna leh inhmelhriattirna a nei nghal a. Upa R. Zodingliana, BEC member-in Zirlai ti tha te hnenah Certificate a hlan a, Rev. B. Zobiaktluanga, incharge Aizawl South-in Thuchah sawiin zirlaite Pathian hnenah a hlan a. Pu Lalvena Hnamte, BEC Member-in zirlai chhuakte tawngtaisakna hun a hmang a, Pi Zirnuntluangi, Office Assistant-in lawmthu sawiin Rev. P.C. Rohliran malsawmnain inkhawm a tin a ni. He hunah hian Synod Mission Choir leh Nl. Kawngkharmawii te an zai bawk.
Presbyterian Hindi Bible School, Bawngkawn, Aizawl hi Mizoram Synod Mission Board chhunga hnamdang ringtharte rinna kawnga tihnghehna tura a din a ni a. August ni 24, 1990 khan hawn a ni a, September ni 15, 1990-ah zirlai mi 20 nen class tan a ni. Hun kal zelah Synod chuan India ram hmun hrang hrangah Mission Field a hawng ta zel a; chuvangin, State hrang hrang leh ram pawn - Nepal leh Bhutan atangte pawhin zirlai an lo kal thin a. A din tan kum 1990 atanga thla thum course ni thin kha kum 1998 atangin thla ruk course-a tih sei a ni a, kum khatah batch hnih neih thin a ni.
For more Pics Click Here