Prison Ministry
» June 30, 2024 (Pathianni) zan khan Aizawl khawpui chhung kohhran pasarih - Bawngkawn Brigade, Bawngkawn Shalom, Edenthar, Edenthar Vengchhak, Lily Veng North, Ramhlun Sport Complex leh Ramhlun Vengthlang kohhranah te  Synod Prison Ministry Awareness programme hman a ni a. Synod Prison Ministry Committee-ten he hun hi an hmanpui a ni.

» July 2, 2024 (Thawhlehni) khan Prison Ministry Director, Rev. Lalhmuchhuaka leh Counsellor-te'n  Khawngaihna In,  Chite Veng an tlawh a. He hmuna awm, a duhte tana Pathian thu zirna tur, 'Bible Ralchhan' hlanna hun inkhawm tawi an hmang a ni.

» July 2, 2024 (Thawhlehni) khan District Jail, Armed veng-a hman tur Basketball ring, net leh ball pathum hlanna inkhawm tawi neih a ni a. Thilpek hi Synod Prison Ministry Counsellor-ten Jailor, Pu H.Z. Lalrinfela hnenah an hlan a. Heng thilpekte hi Tv. Lalrempuia, Speaker, Saltang Chhuahtu Team ṭhahnemngaihna leh hmalakna azarah Mizoram Basketball Association-in Synod Prison Ministry kal tlanga an pek a ni.

Kohhran Hmeichhia
» June 26, 2024 (Nilaini) khan J.M. Lloyd Hall-ah Central Hmeichhe Committee an thu khawm a. Meeting hi Chairman, Pi Zothanparin a kaihruai a, Pi Lalfakmawii, General Secretary hnen atangin report ngaihthlak a ni.

» June 29-30, 2024 chhung khan Ruantlang Bialah Leadership Training leh Kristian Chhungkaw Campaign neih a ni a. Pi R. Lalrempuii, Finance Secretary leh Pi Lalrammawii, Committee Member-in he hun hi an hmanpui a ni.

» June 29-30, 2024 chhung khan Champhai Bethel Bialah Leadership Training leh Kristian Chhungkaw Campaign neih a ni a. Pi C. Thanpari, Committee Member leh Pi Lalhmingmawii, Committee Member ten he hun hi an hmanpui a ni.

Kristian Thalai Pawl
» July 2-16, 2024 chhung hian Mizoram Synod Choir chu Wales ram kohhrante tlawhin an kal mek a. Wales tlawh hian zaipawl member-te bakah Rev. R. Vanlalnghaka, Synod Moderator; Upa Lalmuanpuia, CKTP General Secretary; Pu Lalruatfela, CKTP Asst. Leader leh Zaipawl Director, Pu C. Hmingthanzauva, CKTP C/M te an kal bawk a ni.

» July 5-20, 2024 chhung hian 'I love Taiwan' programme hmangin Central KTP aiawhin heng mite hi Taiwan tlawhin an kal bawk ang.
1) Rev. Dr. Rosiamliana Tochhawng, Leader
2) Pu C. Lalkhawngaiha, Asst. Secy.
3) T. Upa Rinsailova Sailo, Treasurer
4) Tv. Lalremsiama Khiangte C/M
5) T. Upa Lalbiakfela C/M
6) Tv. T. Vanlalruata, Champhai Vengthlang
7) Nl. Rebec Lalhruaimawii, Mission Veng