July 3, 2024 (Nilaini) chawhnu dar 3:00 khan Synod Office Devotion Hall-ah Zirlai Viltu Committee chuan Synod Resource Centre-a inziak lut zinga All India Civil Services Examination (Prelims)-a inziak tling, Lalremsiama Darchhun hnenah Incentive, Rs. 80,000/- an hlan.
He programme hi Rev. K. Lalrinmawian a kaihruai a, Synod Resource Centre chanchin tlangpui Pu R.L. Rinawma, IRS(Rtd)-in a sawi. Thusawi tawi, Pu C. Lalsawta, IAS(Rtd), Rev. Dr. K. Lallawmzuala, Exe. Secretary, Pu Benjamin-a, IDAS(Rtd) leh Tv. Lalremsiama Darchhun te hnen atangin ngaihthlak a ni bawk a, Rev. Dr. K. Lallawmzualan Incentive hi Tv. Lalremsiama Darchhun hnenah a hlan a. Pu Lalsiammawia Fanai, Zirlai Viltu Committee Secretary-in lawmthu a sawi a ni.
Tv. Lalremsiama Darchhun hi Synod Resource Centre din a nih tirh atanga CSE (Prelims) inziak tling hmasa ber leh awmchhun a ni a. HSLC (MBSE)-ah exam dawnin a pa a boral a, topper a ni ta tho va. HSSLC (Sc) topper a ni leh bawk. St. Stephen's College, Delhi atangin B.Sc (Physics) a zo tawh a ni. An unau hi 4 an ni a, a upa ber dawttu a ni a, Tanhrilah a nu hovin an khawsa mek a ni.
Zirlai Viltu Committee hian a din tirh atangin All India Service hrang hranga Mizo thalaite an inziah tlin theihna turin theihtawpin hma a la a. A mamawhten an pan theih turin Synod Resource Centre a din a, All India Service pensioner, mi tlawmngaiten Centre hi an vil reng bawk thin. Kum 2021 atang khan Incentive hi pek a ni thin a, 2021 khan mi pasarih hnenah pek a ni a, kum 2022-ah mi pali hnenah pek a ni leh bawk. CSE(Prelims)-a Mizo inziak tling chu pek vek thin an ni a. Kum 2024 atang erawh chuan Synod Resource Centre atanga inziak tlingte chauh pek a ni ta a ni.
For more Pics Click Here