Vawiin (Oct. 18, 2016) dar 10:00 am khan Presbyterian Communications Board meeting vawi 162-na chu Lloyd Hall, Synod office ah an thu.
He meeting hi Rev. H. Lalrinmawia, Synod Moderatorin a kaihruaia, Secretary hnen atangin report ngaihthlak a ni bawk. Tuntum Prescom Board meetingah hian Bookroom Branch leh Distribution centre hawn belh chungchang te, Paper harsatna in a nghawng chungchang te leh kum 2017-2018 Budget Estimate te an thlir ho. Tunhnaiah hian North East India lamah Paper mill te khar a nih avangin paper lei tur a vang a, a awm chhun pawh a to hle a, hei vang hian Prescom lam hian Paper lamah harsatna an tawk a. Prescom hotuten theihtawpchhuaha paper lei tur an ngaihtuah avangin harsatna lian lutuk an tawk lo hram a, lehkhabu chhut tur lam erawh duh angin an chhut ran theih loh phah a ni. Synod Inkhawmpui atana Synod Department hrang hrangte inruahman lawkna Committee hi nimin (Oct. 17, 2016) atang khan neih tan niin Pension Board an thu a, naktuk (Oct. 19, 2016)-ah Sunday School Committee a thu ang a, October 20&21, 2016 hian Mission Board a thu leh ang a, October 24, 2016-ah Theological Education Board, October 25, 2016-ah Hospital Board, October 26, 2016-ah Pastoral Committee te an thu leh ang am October 27, 2016-ah Education Board, October 28, 2016-ah SL&PB Committee an thu ang.
November thla chhungin Board leh Committee chi 4 an la thu leh bawk ang.