Vawiin (July 12, 2024) khan Mizoram Christian College chuan Dawrpui Multipurpose Centre-ah College Result lawmna leh zirlai tharte lawmna (Freshers Social & Felicitation Programme) an hmang a, Pu Lalnghinglova Hmar, Minister of State, Govt. of Mizoram chu Khuallian a ni.
He programme hi Dr. Hannah Lalhlanpuii, Asst. Professor-in a kaihruai a, Welcome Address Upa Dr. Tawnenga, Principal, MCC-in a sawi. Result bihchianna T. Lalremruata, Asst. Professor-in a nei a, zirlai tharte (freshers) aiawhin Zorinpuiin thu a sawi a, Senior aiawhin Lallianpuii Pachuauin a sawi thung. Khuallian, Pu Lalnghinglova Hmar-in thu a sawi hnuin Library User Award sem a ni. Programme-ah hian special item chi hrang hrang heng mite hnen atang hian en leh ngaihthlak a ni - Chuailo Cultural Club, Art and Music Club, Lalmuanpuia(Alumni), MCC Staff(Live band) bakah C. Lalruatkimi(solo).
June thlaa Mizoram University hnuaia Under Graduate (Arts & Commerce) 6th Semester & 4th Semester result chhuakah Mizoram Christian College chuan result tha tak an nei a. 4th Semester result chhuakah pass percentage chu Arts-91.11%, Commerce-64.71 %, BBA-75% a ni a. 6th Semester result chhuakah khan zirlai 81.36 %-in an pass a, subject hrang hranga an pass dan chu Sociology-100%, Commerce-100%, English-66.67%, Mizo-80%, Public Administration-64.29%, Political Science-87.50% a ni. University top 10-ah mi pathum an lang bawk a - Public Administration Department-ah Daniel Rinmuanpuia pakhatna a ni a, English Department-ah Magdalene Laltlanhlui Khiangte pathumna a ni a, Sociology Department-ah H. Laltlanthanga chu pangana a ni bawk.
New Education policy (NEP) 2020 hnuaia 2nd Semester result chhuakah, Mizorama College hrang hrang zinga Arts bika a ti tha ber dawttu an ni bawk a, Arts-ah hian 86.15% an pass a. Commerce subject-ah 60.87% pass-in Mizorama College ti tha pathumna an ni bawk a ni.