MCC BUATSAIHIN NI KHAT AWH MIZO TAWNG ZIR HONA
August 02, 2024 | NEWS
July 31, 2024 (Nilaini) khan Department of Mizo, Mizoram Christian College leh Mizo Language Development Board tangkawp chuan "Ni Khat Awh Mizo tawng Zir hona" (One Day Workshop on Mizo Language) an buatsaih.
Hun hawnna (Inaugural session) kaihruaitu P.C. Lalngaihzuala, HoD, Mizo Department, Mizoram Christian College chuan Mizo tawng tihhmasawn nana Mizo Language Development Board-in an thawhpui hmasa ber college an ni chu lawmawm a tih thu a sawi a, Mizo tawng humhalhna leh chawikanna kawngah MCC chuan theihtawp a chhuah zel tur thu a sawi a.
Inlawmna thuchah sawitu Principal Dr. Tawnenga pawhin Mizo Language Development Board an thawhpui thei leh, Mizo tawng zir hona a tel tura mi thahnem tak an lo kal khawm thei chu lawmawm a tih thu a sawi a. Synod hnuaia MCC felfai taka enkawl a nih dan sawiin, kal khawmte chu an dinhmun luah mek chu Pathian kohna a ni tih hriaa, an thiltih mekah theihtawp an chhuah chuan, chu chuan a tha zawnga nghawng a neih ngei tur thu sawiin, Kohhrana hruaitute tih tur awma kan ngaih thin hi Kristian kan nih avangin kan zavaia kan tih tur a nih thu a sawi bawk.
Zir hona sawi hawngtu(Keynote Speaker) Pu R. Lallianzuala, Chairman, Mizo Language Development Board-in Mizo Language Development Board din a nih dan leh hmalak tawh dan tlangpui sawiin, Mizo Thu leh Hla leh tawng tihhmasawnna kawngah theihtawp an chhuah zel dawn thu a sawi a, MLB hmalakna chu Politics thil ni lovin, hnam thil a nih thu sawiin, chutianga an hmalakna kawnga MCC an thawhpui thei chu lawmawm a tih thu a sawi bawk.
He hunah hian Pu Rozama Chawngthu leh Pu Lalsangzuala, Assistant Professor, Mizoram University te chu Resource Person atan hman an ni a. Zir hona hun khatnaah Pu Rozama Chawngthu-in hun hmangin Mizo tawng Kalphung tih thupui hmangin Mizo tawng chu thlûk nei a nih dan, thumal tihdanglam dan, ri khat tawng a nihna in awmzia a neih dan, thu inkawp, a hnuhnung sawi hmasak chi leh tawng chungchanga thil pawimawh hrang hrangte sawiin, tawng dang seng luh kara siam rem ngai awmte zir ho turin a chhawp chhuak bawk.
Hun hnihnaah Pu Lalsangzuala pawhin Zaizir leh ri thluk (Phonetics & Phonology), Thumal inzawm dan (Morphology), Sentence inzawm khawm dan (Syntax), thumal leh sentence awmze sawina (Semantic) chungchang bakah Mizo tawnga hman sual theih hrang hrangte sawiin, Mizo tawng Grammar felfai taka siam a ngaih thu a sawi bawk.
Sawi hona hunah heng thupui zir ho leh Mizo tawnga hmalakna tur leh mi nawlpui huapa hmasawnna leh inzir ngai laite sawi ho a ni a. Sawi hona hun hi Dr. Lalhlimpuii leh Lalremruati Ngente-in an kaihruai a, Lalchhuanawmi, 1st Semester, Mizo Department-MCC in kal khawmte zaiin a awi a, he hunah hian MCC department hrang hrang 5th Semester zirlaite bakah, ICFAI University, Govt Johnson College leh Govt. T. Romana College Mizo Department zirlai leh zirtirtute an tel ve bawk a ni.
