August 22, 2024 (Ningani) khan Presbyterian Bible School (PBS) chuan Batch 58-na pualin Farewell and Dedication Programme, Pi Zaii Hall, Synod Conference Centre, Mission Vengah an hmang.
Programme hi Rev. Lalrinsanga, Principal-in a kaihruai a, Rev. R. Vanlalnghaka, Synod Moderator-in zir chhuakte hnenah Certificate hlanin thuchah a sawi a, Moderator chuan thiamna leh kum lamah pawh in ang lo tak tak kal khawm kan ni a, kan hma hun zelah Pathian leh kohhran tana mi tangkai leh chhawrtlak ni zel turin zirlaite a chah a ni. Zirlai exam-a ti thate hnenah Rev. P.C. Pachhunga, Finance Officer-in lawmman a hlan a, class kai kimte hnenah Rev. H. Laltlanthanga, Statistician-in lawmman a hlan a, Pu C. Awithanga Award chu Upa Vanlalsawma Siakeng, Synod Secretary (Jr.)-in a hlan bawk.
PBS-ah hian a din tirh atangin tun thleng hian zirlai 2760 an awm tawh a, chung zinga 22305 chuan tha takin an pass tawh a. Tuna batch 58-naah hian zirlai 37 awmin zirlai 34-in tha takin an pass a, exam lo 3 an awm.
Exam-a ti tha zual pathumte hnenah lawmman Rs.1000/-, Rs.700/-, Rs.500/- leh lawmpuina thuziak PBS Committee hminga hlan a ni a, chungte chu:-
1-na - Vanlalnghaka s/o Vanramlawma, North Khawlek Kohhran
2-na - Lalsiamkima s/o S. Mangkhuma, N.E. Tlangnuam Kohhran
3-na – C. Lalramchhuana s/o C. Lalbiaknunga, Bungkaw Vengthar Kohhran te an ni.
Batch 58-na zirlai zingah hian class kai kim mi paruk hnenah lawmman Rs.500/- theuh hlan a ni.
Kum 2014 atangin Christian Theology subject leh Kohhran Inrelbawlna leh PCI Danpui subject-a ti tha berte hnenah Pu C. Awithanga Award hlan thin a ni a. Batch 58-naah hian Kristian Theology subject-ah C. Lalramchhuana’n mark 84% hmuin Award a dawng a, Kohhran Inrelbawlna & PCI Danpui subject-ah Vanlalpara Ralte-in mark 90% hmuin Award hi a dawng bawk. Award hian Rs.1000/- a keng tel a ni.
For more pics Click Here