Prison Ministry
September 1, 2024 (Pathianni) khan Synod Prison Ministry chuan Mizoram chhunga Jail hrang hrangah hun an hmang a. Central Jail-ah chuan chawhma inkhawmah Prison Welfare Committee General Secretary ni lai leh lo ni tawhten hun an hmang a. Chawhnu inkhawm hi Tv. Lalthansanga Sailo, Counsellor-in a kaihruai a, a vawi khat nan Mizoram Synod Choir-in zaia rawngbawlna hun an nei a, Pu C. Hmingthanzauva, Director, Mizoram Synod Choir-in thuchah tawi a sawi a, Pro. Pastor Lalrinpuia Pachuau, Pukzing Bialin Pathian thuchah a sawi a ni.
September 1, 2024 (Pathianni) vek khan Central Jail Masihi Sangati lamah One Day Crusade neih a ni a. Nl. Pumpua Gurung-in zaia rawngbawlna a nei a, Upa H. Lallungmuana, Counsellor, Prison Ministry-in a thu a sawi a ni. Central Women's Jail lamah pawh One Day Crusade neih a ni a, Prison inmate Nl Linda-i a zai a, Rev. Dr. H. Lalnunmawia, ATC-in thu a sawi.
Aizawl khawpui pawn lama District Jail hrang hrangah, Synod Prison Ministry Sub-Committee ruahman angin rawngbawlna neih a ni bawk.
Synod Literature & Publication Board (SL&PB)
August 31, 2024 (Inrinni) khan Luangmual Kohhranah Mizo tawng hman dik chungchang zir hona neih a ni a, hemi hun hmanpui hian SL&PB atangin Asst. Editor-te, Pi Rinsailovi leh Pu Zohmangaiha an kal.
MSSU
August 31, 2024 (Inrinni) hian Tawipui North-II Bialah Sunday School zirtirtu training neihpuiin trainer-te, Upa K. Zoremsanga, Upa S. Kapzathanga leh T.Upa B. Malsawmtluanga an kal.
Trust
August 29-31, 2024 chhung khan Guwahati leh Shillong-ah Synod House sak enin Rev. P.C. Pachhunga, Finance Officer leh Upa Thangliankhuma, A.E te an kal.
Mizoram Christian College
August 23, 2024 (Zirtawpni) khan Club Day an hmang a, Club hrang hrang – Cultural Club, Adventure Club, Art & Music Club, Literature Club leh Agripreneur Club ten anmahni Club theuh thiltum tihlawhtling turin activity hrang hrang an nei a ni.
Adventure Club chuan Adventure Training an neih bakah College tual zawlah Silai inkahsiak an buatsaih a, target kap fuhte hnenah lawmman an pe a. Art & Music Club chuan Session khatnaah Fine Art lam hawia hun hmangin, Mizoram Academy of Arts, Mission Veng chu a hmunah an tlawh. He hunah hian Artist, John Zochhuanawma, Bachelor of Fine Arts chuan lecture a pe a, club member zirlaiten practical tiin hun an hmang bawk. Session hnihna chu College lamah hmangin Lalremsanga, Bachelor of Music, University of Wolverhamton, United Kingdom, Resource Person-in ‘General Music Knowledge’ tih thu a sawi a ni. Agripreneur Club chuan College-ah Limbu sawr dan inzirtirin hun an hmang a, Limbu tui an sawr hi an hralh chhuak nghal bawk a ni.
Kristian Thalai Pawl
August 31, 2024 (Inrinni) khan Hyderabad Branch-ah Leadership Training leh Zai hruai Training neihpuiin CKTP hruaitute, Pu F. Lalremruata Fin. Secy leh Tv. David Lalfakawma, Committee Member an kal.
SYNFO
September 5-6 chhung hian Champhai Venglai Kohhranah Synfo leh CKTP buatsaih Praise On 2024 Audition hmasa ber neih a ni dawn a. Audition neihpui tur hian Judge-te, Upa F. Lalthanmawia, Nl. R. Lalrinmawii, leh Tv. H. Lalthazuala bakah SYNFO Co-ordinator, Pu John Lalhruaitluanga, SYNFO atangin, Pu Peter Lalanpuia, Pu H. Laltanpuia, Pu David Lalruattluanga, Tv. Vanlaldampuia leh Tv. Zochhuana te an kal ang.
Audition hi September 10-ah New Serchhip Kohhranah, September 14-ah Kolasib Hmarveng Kohhranah leh September 21-ah Lunglei Bazar Veng Kohhranah te neih a ni ang a, Aizawl Audition hi September 25-28 chhung hian Tuikual Kohhranah neih a ni ang.