Mizoram Christian College
September 4, 2024 (Nilaini) khan Govt. Hrangbana College-ah Mizoram English Literature Society (MIELS) buatsaih Lit Fest 2024 neih a ni a. He hunah hian MCC Arts & Music Club leh English Department te chu item hrang hrangah an tel ve a, chung zingah chuan MCC Band chu Beat Contest-ah pahnihna an ni.
September 6, 2024 (Zirtawpni) khan NSS Unit, Mizoram Christian College chuan Blood Donation Camp an buatsaih a, Civil Hospital Blood Bank atan thisen Unit 126 an pe a, thisen petute hi mipa 91 leh hmeichhia 35 an ni.
September 10, 2024 (Thawhlehni) khan Management Department 5th Semester zirlaite chuan Off Campus Class-cum-Peractio Couse neiin MISTIC, Directorate of Science and Technology an tlawh a, ‘Introduction to Intellectual Property Rights’ tih thupui hmangin session hlawhtling tak an nei.
September 10, 2024 (Thawhlehni) vek khan Synod Zirlai Viltu Committee atanga sawm an nih angin Synod Resource Centre (SRC) Briefing and Orientation Programme-ah MCC zirlai 12 leh zirtirtu 2 an tel thei a. He huna MCC zirlai kalte hi English, Mizo, Public Administration leh Sociology Department atanga 5th Semester zirlaite an ni.
Prison Ministry
September 8, 2024 (Pathianni) khan District Jail, Aizawl-ah hun hman a ni a. Chawhma Inkhawmah Rev. Lalhmuchhuaka, Director, Synod Prison Ministry-in thuchah a sawi a, Prison inmates Bible chhiar chhuak hnenah Certificate a hlan bawk. Chawhnu Inkhawmah Saltang Chhuahtu Team Speaker, Tv. Lalrempuia'n hun a hmang a, Speaker bakah Pu R.C. Lalmaka'n Thuchah tawi leh fuihna thu a sawi bawk a. Nl. H. Laltharzuali (Thartei) a zai bawk.
Synod Prison Ministry hian chawhma leh chawhnu inkhawm kar lakah, Khawngaihna In, Chite Veng tlawhin inkhawm tawi an hmang a. Rev. Lalhmuchhuaka'n kaihruaiin, Nl. Thartei’n Testimony sawiin zaia rawngbawlna hun a nei bawk.
Campus Ministry
September 6, 2024 (Zirtawpni) khan Presbyterian English School, Sihphir Venglaiah Campus Ministry-in rawngbawlna hun an hmang a. He hunah hian Tv. Lalrinchhana, Counselor bakah Resource person T. Upa K. Lalengzama leh Pu C. John Saiparliana, Ramhlun North te an kal. PES, Sihphir Venglaiah hian zirtirtu leh zirlai 270 vel awm mekin, Class 1 - 10 thleng zirna a awm a ni.
Trust
September 10, 2024 (Thawhlehni) khan Saipum Pastor Quarters sak mek leh Retaining Wall en felin Pu Lalramenga Royte, J.E. a kal.
