September 15, 2024 (Pathianni) hi Mizo Sunday School Union (MSSU) hnuaia Senior Department Inkhawmpui ni a ni a, Presbyterian Kohhran hnuaia Bial hrang hrangah Inkhawmpui hi hman a ni ang.
Bial Sunday School Committee kut anih avangin Bial hrang hrangte kalpui dan erawh a dang hret hret hlawm a, bial thenkhatah intihsiak anga kalpui anih laiin, thenkhatah chuan intawhkhawm anga hmang pawh an awm thin bawk. Bial thenkhatah chuan inrinni zan atanga nei tan an awm bawk.
Kum 1947 Sunday School Committee chuan, "Nula leh Tlangval Sande Sikul Pawl zirlai hran neih rawtna kha a la ding zel a, zawiin la ngaihtuah se tih a ni" tiin a rel a, kum 1954-ah Senior Department hi din a ni ta a ni.
Report thar bera tarlan danin MSSU hnuaia Senior Department-ah zirtirtu 5289 leh zirtu 33119, an vaiin 38408 an awm mek a ni.
September 8, 2024 (Pathianni) khan Presbyterian Kohhran hnuaia Bial hrang hrangah Naupang Sunday School Inkhawmpui (Beginner - Sacrament Department) neih a lo ni tawh a, Pathian thu, hla leh thu inchhang hmangin inelna neih a ni a. Heng bakah hian naupangten item hrang hrang a remchan dan angin an nei bawk.