Synod Social Front leh Laura Aluminium Extrusions tangkawpin an buatsaih, Aluminium Mistiri Training chu September 23, 2024 zan dar 7:00 khan Synod Conference Centre, Pi Zaii Hall-ah hawnna leh Pathian hnena hlanna neih a ni.
Training hawnna leh hlanna programme hi Rev. P.B. Mankima, Synod Secretary-in a kaihruai a. Upa H. Lalhmingmawia, Co-ordinator, Synod Social Front-in inhmelhriattirna leh training kalphung turte a sawi zawhah Rev. V.L. Luaia Hranleh, Executive Secretary i/c Synod Social Front chuan Pathian hnenah training hi a hlan a ni.
Rev. V.L.Luaia Hranleh chuan Training-a telte chu thahnemngai taka zir a, mahni kea ding zui thei ngei tur leh kan ramah aluminium hmanga eizawnna chu eizawnna tling a nih zia sawiin, thiamna rintlak nei tura a duhsak thu a sawi. Laura Aluminium Extrusions neitu, Pi Vanlaldiki pawhin Mizoram-a aluminium lak luh a nih tan dan te, a hnua Mizo ten kan hman zui dan te leh Mizo thalaite thiam chi a nih thute a sawi.
Aluminium Mistiri Training-a tel tur hian diltu mi 56 an awm a, an zinga mi 24 chauh zir tura an lak theih avang leh thiamna duha dil mi tam zawk lak an ni lo chu hrehawm an tih thu Synod Social Front hruaitute hian an sawi a. Tun tuma lak lohte pawh tih leh hun atan dil leh se an duh thu an sawi. Tun tum hi aluminium mistiri training an buatsaih vawi 4-na a nih thu an sawi bawk.
Ni hnih chhung theory-a an zir hnuah practical-a training an nei nghal ang a, training hi October 18, 2024 (Zirtawpni) zanah khar a ni ang.
For more Pics Click Here