Campus Ministry
September 20, 2024 (Zirtawpni) chawhnu khan Durtlang North Primary School leh Middle School-ah hun hmangin Counsellor Tv. Lalrinchhana leh Resource person, T.Upa K. Lalengzama te an kal a. Pathian thua infuihnate neih a nih hnuah 'Drug Awareness Campaign' neiin, Resource Person hnen atangin inzirtirna hun an hmang a ni. He hun hi Durtlang North Joint Churches Action Committee (Kohhran Inzawmkhawm Pawl) ruahmannaa neih a ni.
Social Front
September 20-23, 2024 chhung khan Champhai Vengsang Kohhranah Ruihhlo - Chhungkaw lam hawi & Thalai tana campaign neiin Pu F. Vanlalrochana, Khatla a kal.
September 21, 2024 (Inrinni) khan Mission Vengthlang Kohhranah Ram ngaw, Nungcha leh Tuihna humhalh Seminar neih a ni a, Rescource person Pu P.C. Lalchhandama, Bawngkawn Chhim Veng hovin seminar hi neih a ni.
Prison Ministry
September 22, 2024 (Pathianni) khan Serchhip District Jail, Chhiahtlangah hun an hmang a. Chawhma inkhawmah Upa K. Rosangzuala’n Pathian thuchah sawiin a lehkhabu ziak ‘Tawi Te Chauh-2’ bu hnih, Jail Library tana a pek chu Prison Ministry Director Rev. Lalhmuchhuaka'n a hlan a. Ex Prison inmate Pu R.C.Lalmaka'n thuchah tawi a sawi bawk. Hmeichhe Jail lamah Pu C. Lalchhanchhuaha, Counsellor-in hun a hmang bawk.
Chawhnuah Mipa Jail lamah Rev.Lalhmuchhuaka'n hun a hmang a, Prison Inmate atangin Solo leh Male Voice ngaihthlak a ni a. Hmeichhe Jail lamah Upa K. Rosangzuala'n hun a hmang thung.
He hunah hian Prison Sub-Committee hruaitute - Rev. R. Zorammawia, Chairman, Upa K. Lalbiakmawia, Secretary leh Pu Pachhunga, Committee Member te an tel thei bawk.
Tun dinhmunah Serchhip District Jail-ah tang 77 an awm a, an zinga 72 hi mipa niin, hmeichhia 4 leh naupang 1 an ni.
Mizoram Christian College
Mizoram Christian College Staff Welfare chuan Inkaihhruaina an neih angin MCC-a an thawh hnua Doctorate Degree (Ph.D) hmute hnenah September 23, 2024 khan Devotion hunah lawmpuina an hlan.
MCC Staff Welfare-in Ph.D hmu lawmpuina an pekte chu -
1. Dr. L.V. Lalrintluangi - Department of English
2. Dr. Lalhlimpuii - Department of Mizo
3. Dr. Benjamin Lalfakzuala - Department of Political Science
4. Dr. K.C. Malsawmtluangi - Department of Commerce
MCC staff Welfare hian Inkaihhruaina an neih angin MCC-a an thawh hnua Ph.D hmute chu lawmpui nan Rs. 2000/- an pe thin a ni.
Thawktu thar
Synod Service Board chuan Synod hnuaia Office Assistant leh P.C. Girls’ School-a Chowkidar hna contract-a thawk tur a la thar a, an hna hi October ni 1, 2024 atangin an zawm ang. Lak tharte chu -
Office Assistant:
R. Lalawmpuia S/o Pu R. Lalhmingthanga, Durtlang Venglai
P.C. Girls’ School Chowkidar:
R. Lalramliana S/o Pu R. Vanlalvena, Durtlang Leitan