Synod Higher Secondary School
NSS Foundation Day vawi 55-na chu September 24, 2024 (Thawhlehni) khan Vanapa Hall-ah a lawmna pui ber hman a ni a. He hunah hian Synod Higher Secondary School NSS Unit chuan Mizoram puma Higher Secondary School zinga thisen pe tha ber chawimawina a dawng a, thisen hi unit 276 an pe a. Synod Higher Secondary School NSS Unit te hian tun tum hi a kum zawna thisen pe tha chawimawina an dawn vawi 4-na a ni. Chawimawina hi Pu Lalsiammawia Fanai, Principal chuan Hon'ble Minister, Sports & Youth Affairs Services Department hnen atangin a dawng. Principal hi NSS PO, Dr. Vanlalvanga Ralte, Pu C. Lalrochhara leh Pu Joseph Vanlalhruaia Sailo leh NSS Volunteer 40 leh School Dance Group ten an tawiawm a, Dance Group te hian lam mawi tak an entir bawk. He hunah hian National Awardee Pu Joseph Vanlalhruaia Sailo, SHSS zirtirtu chu State NSS Cell hmingin Chawimawina thuziak Minister hian a hlan bawk a ni.
September 25,2024-a DAPC/DIKSHA leh Aizawl District Education Department-in an buatsaih, Photo Booth Making Competition-ah Synod Higher Secondary School Class XII zirlaite chu tel vein pakhatna an ni a. Lawmman pawisa fai Rs. 5000 leh Certificate an dawng a ni. He Photo booth hi 'HIV Routes Of transmission and prevention strategy' tih thupui hmanga siam a ni.
Social Front
October 5-6, 2024 chhung khan Ram ngaw, Nungcha & Tuihna Humhalh leh Pianpun chungchang Awareness Campaign neiin campaigner-te hetiang hian an chhuak a, Ramhlun Kohhranah Rev. V.L. Luaia Hranleh, Ramthar Veng Kohhranah Dr. Lalbiakmawia Ngente, Maubawk Kohhranah Er. H. Duhkima, Tuikual South Kohhranah Rev. Lalrinmawia, Ramthar North Chawhnu tleirawl inkhawmah Upa Prof. H. Lalthanzara leh Keitum Kohhranah Pu P.C. Lalchhandama te an kal a ni.
Kohhran Hmeichhia
October 5-6, 2024 chhung khan Hnahlan Bialah Leadership Training & Kristian Chhungkaw Campaign neiin Central Hmeichhe Committee member-te - Pi A. Nazi, Pi K. Rinthianghlimi leh Pi Tlangthanpari te an kal a. Inrinni nilengin Leadership Training-in hun an hmang a, Inrinni zan atanga Pathianni zan thlengin bial chhung kohhran hrang hrangah hun an hmang zui a ni.
Kristian Thalai Pawl
Central KTP programme pawimawh tak, Ruihhlo Do Awareness Campaign kalpui mek chu October 2, 2024 (Nilaini) khan Lunglei leh Hnahthial District chhunga Bial KTP hruaitute pualin Lunglei Bazar Veng Kohhranah leh Siaha leh Lawngtlai District chhunga Bial KTP hruaitute pualin Lawngtlai Bazar Veng Kohhranah neih a ni.
Awareness Campaign-ah hian Bial aiawh mi pahnih zel an tel a, anni hi mahni Bial-a Branch hrang hrangten Resource Person atana hmanga Awareness Campaign nei turin Central KTP chuan a beisei a ni.
Prison Ministry
October 6, 2024 (Pathianni) khan Synod Prison Ministry chuan Central Jail-ah hun an hmang a. Chawhma Inkhawmah, mipa lamah Rev. Dr. K. Lallawmzuala, Executive Secretary i/c Prison Ministry-in hun a hmang a, Masihi Sangati-ah Upa H. Lallungmuana, Counsellor, Prison ministry -in hun hmangin Central Women's Jail-ah David Lalnunsanga Colney, Counsellor, Prison Ministry-in hun a hmang a, Nl. Marina Malsawmtluangin zai rawngbawlna a nei. Chawhnu inkhawmah Central Jail, Mipa-ah Rev. Zaihmingthanga, Chairman, Prison Ministry Sub-Committee, Lawngtlai-in hun hmangin, Nl. Marina Malsawmtluang leh Prison inmates Male voice an zai a ni. Masihi Sangati-ah Upa C. Lalsangzuala, Counsellor, Prison Ministry-in hun a hmang a. Central Women's Jail-ah Tv. Lalrempuia, Speaker, Saltang Chhuahtu Team-in hun hmangin, Tv. C. Lalmalsawma leh Prison inmate-te an zai bawk.
Rev. Dr. K. Lallawmzuala, Executive Secretary chuan Prison Ministry Counselling Room chei that a hmunah tlawhin a enfiah nghal bawk a ni.
Aizawl pawna District Jail hrang hrang - Champhai, Chhiahtlang, Kolasib, Lawngtlai, Lunglei, Mamit leh Siaha-ah te pawh Prison Ministry Sub-Comittee ruahman angin Chawhnu Inkhawm neihpui an ni bawk.
Mizoram Christian College
October 7, 2024 (Thawhtanni) khan Mizoram Christian College (MCC) Foundation Day an lawm a. College din ni tak hi October 5 (Inrinni) a nih avangin October 7-ah hian lawm a ni. MCC Department tina 5th Semester zirlaite hnen atangin College experience an neihte ngaihthlak a ni a, Upa Dr. Tawnenga, Principal hnen atangin MCC din chhoh dan leh fuihna thu ngaihthlak a ni bawk.
Synod Zirna Ina zirlaite che tha
Lamtluang Life Skills Academy-in September thlaa Higher Secondary School hrang hrangte pual Public Speaking Competition a buatsaih leh October thlaa Inter-College Public Speaking Competition a buatsaihah Synod zirna in naupangte an che tha a. Inter-College Public Speaking Competition-ah hian MCC zirlai, Angela Vanlalduhsaki, 5th Semester, English Department chu pakhatna a ni a. Higher Secondary Public Speaking Competition-ah hian Mesak Lalrinhlua Varte, Synod Higher Seconday School-a Class 12 Science zirlai chu pahnihna a ni bawk.
