Nizan (Nov. 24, 2016) khan Lay Leaders’ Training vawi 194-na kharna inkhawm chu Synod Multipurpose Training Centre (SMTC)-ah neih a ni.
Training kharna inkhawm hi Rev. Vansawma, Programme Director-in a kaihruai a, Rev. Lalzuithanga, Moderator Elect in Certificate semin thuchah a sawi a. Tv. David Lalrohlua'n Pathian fakna hla a sa a, trainees aiawhin Upa R.L. Kapthanga'n thu a sawi a, Rev. K. Lalthangmawia'n lawmthu sawina hun a hmang a, inkhawm hi tin a ni. He Lay Leaders’ training hi November 21, 2016 atangin neih tan a ni a, training hi Rev. Lalramliana Pachuau, Senior Executive Secretary-in a hawng a ni. Training-ah hian Aizawl East, Aizawl West II, Hmarchhak, Lunglei West, Tuirini, Tuivawlral leh Tawi Presbytery atangin Kohhran Upa 38 an tel thei a ni.
Synod Multipurpose Training Centre-ah hian Lay Leaders' training hi 1996 atangin neih tan a ni a. SMTC hmunah tum 158 leh hmun dangah tum 35 training neih tawhah Kohhran Upa 6156 training an awm tawh a ni. Kohhran Upa training-ah hian Kohhran kaihhruaina leh chawmna chi hrang hrang zir thin a ni.