October 29, 2024 (Thawhlehni) chawhma dar 10:00 khan Nursing College Multipurpose Hall, Synod Hospital-ah Synod Hospital Board vawi 148-na an thu a, Synod Moderator, Rev. R. Vanlalnghakan a kaihruai a. Dr. Lalthakima, Board Secretary hnen atangin Hospital Report ngaihthlak a ni bawk.
Report-ah hian thawktu mi 12 an kaisan thu te, Hospital Centenary (kum 100-na) lawm SEC-in rem a tih thu te, Health & Hospital Sunday-ah kohhran 19 atanga sawmna dawn angin thawktu mi 22 an kal chhuah thu te, thawktu mi 35 dah ngheh an nih thu te, Indian Nursing Council-in Nursing College-a B.Sc Nursing zirna chu 2024-25 atan kalpui chhunzawm zel a remtih thu te leh thu pawimawh tak tak dangte a tel a ni.
Hospital Board thut khawm vawi 148-naah hian thu ngaihtuah tur 25 chuang chhawp chhuah a ni a. Chung zingah chuan Asst. Nursing Superintendent ruat chungchang te, Post ruak hnawh khah dil chungchang te, John Williams Hospital hmathlir policy siam dilna te, ICU room renovate leh tihzauh chungchang te, Millenium Centre-a Synod Hospital Clinic tangkai zawka hman rawtna te, kum 2025-2026 Hospital budget ruahmanna te, kum 2023-2024 Synod Hospital Report thlir ho te chu a langsar zual a ni.
Chawhnu dar 1-ah Synod Hospital Centenary Building Lungphumna neih a ni a, programme hi Rev. V.L. Luaia Hranleh, Executive Secretary i/c Hospital-in a kaihruai a, Synod Moderator, Rev. R. Vanlalnghakan Pathian hnenah hlanin lungphum hi a phum a ni. Rev. C. Zorammawia, Sr. Executive Secretary-in inlawmna leh report a sawi a, Rev. P.B. Mankiman lawmthu a sawi a ni.
Synod Hospital hian kum 2028-ah kum 100 a tling dawn a, chumi denchhen chuan Project neih ni se tiin kum 2022 Synod Inkhawmpuiin a rel a. Hei hi bawhzui zel niin Plan and Estimate te chu SEC 302-na chuan a pawm a. Synod Hospital Centenary Building hi November 1, 2024 atanga sak hna thawk tan turin a lungphum pawh phum a ni ta a ni.
He building hi chhawng thuma sak tur a ni a, chhawng hnuaiah Basement pathum awm tura tih a ni a. Ground Floor-ah Blood Bank a awm ang a, First Floor chu Pathology Unit atana hman tur a ni ang a. Second Floor-ah hian Microbiology Department an awm thung dawn a ni.
Synod Hospital Centenary Building hi L.T. Construction, Ramhlun Venglai chu sa tura thlan an ni a, thla 30 chhunga sak zawh tura ruahman a ni.
For more Pics Click Here