Mizoram Presbyterian Kohhran chuan nakkum 2025-a Puitling Sunday School zirlaibu tur, Rev. Dr. L.H. Rawsea ziah “Thuthlung Thar Zirtirna” tih chu an tichhuak ta.
Presbyterian Kohhran Puitling Sunday School zirlaibu hi Mizo lehkhabu malkhaiah chuan copy chhut chhuah tam ber a ni thin a. Kum 2025 atan hian Copies 95,000 zet chhut a ni.
Nakkum 2025 hian Mizoram Presbyterian Kohhran chuan Puitling Sunday School-ah “Thuthlung Thar Zirtirna” tih zir a ni dawn a. He zirlaibu hi Presbyterian Pastor-te zinga mithiam, Rev. Dr. L.H. Rawsea ziah a ni a. A ziaktu Rev. Dr. L.H. Rawsea hi tawn hriat ngah tak, Mizoram Synod-in Thuthlung Thar mi thiam a neihte zing ami a ni a, Pro. Pastor a nih lai atanga ATC-ah a hun tam ber Lecturer hna thawkin kum 2024 atang hian Melriat Pastor Bial Vawng tura dah a ni. He zilaibuah hian zirlai 46 awmin phek 268 zeta chhah a ni bawk. Mizoram puma Synod Bookroom dawr zawng zawngah lei theih tura chhawp chhuah mek a ni a, Rs.100/- chauha lei theih a ni ang.
Kum thara Mizoram Presbyterian Kohhran Puitling Sunday School zir tur hi zirlai bu 101-na a ni a. Kum 100 chhung hian Puitling Sunday School zirlai atan Thuthlung Thar bu chhung ami hi vawi 47 zir a ni tawh a, Thuthlung Hlui nen inkawpin vawi 8 zir a lo ni tawh bawk.
Mizoram Presbyterian Kohhran Puitling Sunday School zirlaibu hi Mizoram Synod hnuaia Kohhran zawng zawngte zirlaibu a nih bakah Presbyterian Church of Myanmar (PCM) hnuaia Synod-te’n an zirlaibu atan an hmang ve nghal zel a. Kumthar lamah pawh Presbyterian Church of Myanmar te chuan an zirlai bu a ni ve leh nghal dawn a ni.