Vawiin (Nov. 15, 2024) khan Tuikhuahtlang Presbyterian Kohhran Hall-ah Presbyterian Pastor Pension Fellowship (PPPF) ten intawh khawm programme tum 55-na an hmang.
Programme hi session hnihah thenin, chawhma leh chawhnuah te hun hman a ni. Intawh khawmah hian mi 104 (Mipa 59 leh Hmeichhia 45) an kal a, PPPF-ah hian member 136 an awm mek a ni.
Intawhkhawm session 1-na hi Rev. C. Rosiama, PPPF Chairman-in a kaihruai a. Rev. Zawlthuama, Bawngkawn Shalom-in hunserh a hmang a, Rev. Dr. H. Vanlalauva, PPPF Secretary-in inlawmna leh inhmelhriattirna a nei. Chawhma hunah hian ‘Kohhran nun hona leh rawngbawlna’ tih thupui Rev. Dr. Lawmsanga ziah chu zir ho niin, sawi hona neih zui nghal a ni a, Nl. Lalduhsaki tum hnih a zai bawk. Chawhma hunah hian ‘Tawn Hriat Bu 2-na’ lehkhabu chu Rev. Robawiha’n a tlangzarh a, he lehkhabuah hian mi 52-in an tawn hriat an ziah chu dah a ni.
Session 2-na, chawhnu hun hi Rev. Dr. Zaihmingthanga, PPPF Vice Chairman-in a kaihruai a, sharing leh intihhlimna hun an hmang a, hun tawpah Rev. Dr. Lalchungnunga, PPPF Asst. Secretary-in lawmthu a sawi a ni.
Presbyterian Pastor Pension Fellowship-ah hian Pastor pension apiang an tel zel a. Kum tinin intawhkhawm hi an nei thin a, infuih tharna leh inpawh tlanna hun hlimawm tak an hmang thin a ni.
For more Pics Click Here