Rev. F. Lalchhuanmawia (kum 62), Bungkawn Bialtu Pastor chu nimin (Nov. 18, 2024) chawhnu dar 2:50 khan cancer avangin a thi a, vawiin (Nov. 19. 2024) chawhnu dar 1:00 hian Rev. Dr. C. Chawnghmingliana, Ex-Moderator-in Bungkawn Kohhran Biak Inah a vui ang.
Rev. F. Lalchhuanmawia hi Pu Chhuanliana (L) leh Pi Ramliani (L) te fa pariat (Mipa 5 leh Hmeichhia 3) zinga mi niin Durtlang-ah December 16, 1962 khan a lo piang a.
Kum 1994 April ni 14 khan Dr. Lalremmawii d/o Sub. R.Lalkhuma (L) leh Darhmingthangi (L) Mission Vengthlang nen Durtlang Kohhranah Rev. C. Vanlalringa’n a inneihtira, fanu pakhat leh fapa pakhat an nei.
An fate:
1. John F. Lalrammawia
2. Grace Nuntluangi Fanai
Zirna lam
Primary atanga High School (Matric) thleng Durtlangah a zira, Pachhunga Univeristy College (PUC) atangin PU leh B.A. a zir a. Kum 1981 khan B.Th zir a dila, lak a nih loh avangin PUC-ah a zir chhunzawma; B.A. II Year a zirlai, kum 1986 khan B.Th. zir hi dil lehin zir tura lak a ni ta a. Kum 1986 - 1989 chhung hian Aizawl Theological College (ATC), Mission Vengthlangah B.Th. hi a zir ta a ni.
Kum 1999 khan Bishop College, Kolkata-ah Bachelor of Divinity a zir leh a, kum 2002 khan a zo va. Kum 2007 - 2009 chhung khan Tamil Nadu Theological Seminary, Madurai, Tamil Nadu-ah M.Th. a zir leh a ni.
Rawngbawlna lam
A nu leh pate hian a pian hma atangin mipa a nih chuan Pastor turin an lo hlana, a hriat theih hmasak ber pawh “Pastor atan kan hlân che” tih a ni awm e. Chuta tang chuan Pastor niha rawngbawlnaa kal chu a tum ber a ni. Kum 1976 March ni 6 khan Rev. Vanlalnghaka, Shillong, rawngbawlna Durtlang Kohhrana neih atangin piantharna a chang a. Kum 1984 khan Harhnain nasa takin a khawih leha, an bialtu pastor Rev. Lalchâma Sermon atangin hun puma rawngbawl turin Pathian hnenah a inpe thar leh a ni. Durtlang Kohhranah NPSS zirtirtu, KTP-ah Bial leh Branch-ah Committee leh OB post hrang hrangte a lo chelh tawh bawk.
B.Th a zir zawh hlim hi El Bethel Harhnain Zoram a tuam lai kha a ni a. Ani pawhin El Bethel rawngbawlna hi a ngai pawimawh hle a. B.Th a zir zawh hlim hian El-Bethel Revival Team-ah Tawngtai khawl Leader-in a awm nghe nghe.
Kum 1990 khan Pro Pastor atan lak a ni a, kum 1992-a Bungkawn Kohhrana Synod Inkhawmpui chuan Pastor atan a nemnghet ta a ni. A awm tawhna, zirna leh chanvo a chelh tawhte:
1. 1990 - 1991 : Pro Pastor : Sairang Pastor Bial
2. 1992 : Pro Pastor : Sateek Pastor Bial
3. 1993 - 1999 : Zawlnuam Pastor Bial
4. 1999 - 2002 : B.D., Bishop College, Kolkata
5. 2002 - 2007 : Chhiahtlang Pastor Bial
6. 2007 - 2009 : M.Th, TTS, Madurai, Tamil Nadu
7. 2009 - 2013 : Lunglei Chanmari Pastor Bial
8. 2014 - 2018 : Chanmari West Pastor Bial
9. 2019 - 2024 : Bungkawn Pastor Bial
Rawngbawlna chanvo a chan tawhte
Pastor rawngbawlna a thawh hnuah rawngbawlna fawng pawimawh tak tak a chelh tawh a -
Bial Chairman
Kum 1996, 2005, 2011 leh 2016
Presbytery Moderator
Kum 1997, 2001, 2006 leh 2017
Synod Executive Committee (SEC), Ramthar Board Committee, Synod Finance Committee, Synod Education Board-ah a lo tel ve tawh a, tunah hian Synod Theological Education Board member a ni mek.
A mizia
Rev. F. Lalchhuanmawia hi Mizo pa pian tha, sa inphut tak a ni a, thahrui pawh a ngah hle. Mi inuluk tak mi a ni. Committee kaihhruai a thiam hle a, thu har leh khirh deuhah pawh thutlukna fing leh dam thlap mai siam thiam em em a ni. Kohhran Upate rawngbawlna kawngah a ring ngam a, a ring thiam a, thawhhona boruak tha tak a siam thiam hle. Mi tawng tam lo a ni a, midang a zahthiamin a ngai pawimawh thiam hle. Mi rilru tina zawng awm duh lo mi a ni a, rawngbawlna ngai pawimawh leh mi inpe tak a ni.
A nat dan
Kum 2023 March thla vel atang khan a khêl na a sawi thin a. Sciatica emaw, nerve lam tha lo emaw a nih rin a ni a, damdawi inah te pawh inentir a ni a, mi hmeh thiam te pawh an pan a, therapy te pawh an la a. Mahse, dam lam a pan mai si loh avangin MRI hmangtea en a ni a.
Kum 2023 December khan Ebenezer Hospital-ah a inentir a, MRI atangtea an en hnuah a khêl ruh chuktuah tuamtu cancer nia rinhlelh a ni a, Dec. 21, 2023 khan Kolkata-a Apollo Hospital pan thlakpui a ni a. Hetah hian investigation chi hrang hrang tih a ni a, cancer a ni tih hriat a ni a. Kolkata-ah hian radiation vawi 25 lai tih a ni. Kolkata-a an inenkawl hnu hian kumin February thla khan Mizoramah an rawn haw a.
March, 2024 khan in-check-up turin Tata Memorial Cancer Hospital, Mumbai panpui leh a ni a; a cancer hian a chuap te pawh a thleng tih hmuh belh a ni a. Inenkawlna hrang hrang tih a nih hnu, thla khat an awm hnuah an rawn haw leh a. June thla khan in-check-up-in an kal leh a, hemi tum hian chemotherapy hmanga enkawl a ni thung. Hun eng emaw chen an inenkawl a, October thla khan Aizawlah an rawn let leh a, Aizawlah hian chemo-te pawh a lak chhunzawm a.
Aizawla an rawn lêt hnu lawk atang hian a khua a sik a, thâwk a harsat a. Hengte avang hian October 17, 2024 khan Civil Hospital-ah admit a ni a. Theihtawpa enkawl a ni nachungin, a natna a nat em avangin Nov. 15, 2024 khan ICU-ah dah luh a ni a. Ventilator te nena enkawl a, theihtawp chhuah a nih laiin, Nov. 18, 2024 chawhnu dar 2:50 khan a rawngbawlsak Lalpa hnena chawl turin a kal ta a ni.
REV. F. LALCHHUANMAWIA
VUINA PROGRAMME
A hmun : Bungkawn Kohhran Biak In
A hun : November 19, 2024 chawhnu dar 1:00
Vuitu : Rev. Dr. C. Chawnghmingliana, Ex-Moderator
Chanchin sawi : Rev. PB Mankima, Synod Secretary Sr.
Zaipawl : Bungkawn Kohhran Zaipawl
Thlamuanna thuchah : Rev. Dr. C. Chawnghmingliana, Ex-Moderator
Tawngtaisaktu : Upa Vanlalsawma Siakeng, Synod Secretary Jr.
Zaipawl : Bungkawn Pastor Bial Zaipawl
Hla sak ho : ‘Van hmun ropui hmangaih ram khi’ KHB NO. 489
Malsawmna : Rev. H. Laltlanthanga, Statistician
Thlanmual
Hun hmangtu : Rev. Z. John Malsawma Colney, Partnership Secretary