Nizan (Nov. 25, 2024) khan Pi Zaii Hall, Synod Conference Centre-ah November 14-25, 2024 chhunga Family Guidance & Counselling Centre (FG&CC)-in Pastoral Care & Counselling Training vawi 32-na an buatsaih chu kharna hun hman a ni a, tun tumah hian Pastor 16 an tel thei a ni.
Training kharna hun hi Rev. Lalthangpuia, FG&CC Director-in a kaihruai a, Rev. Lalsangbera, Resource Person-in kalkhawmte lawmna neiin lawmthu a sawi a, Rev. K. Lalrinmawia, Resource Person-in Final Evaluation a tihpui a. Rev. V.L. Luaia Hranleh, Executive Secretary-in Certificate a sem zawhin thuchah a sawi zui bawk. Trainee-te atangin group zai ngaihthlak a ni a, Trainee-te tana tawngtaisakna hun Rev. Lalfakzuala, Committee Member-in a hmang a ni. Hemi hunah hian Tv. Israela Pachuau leh Nl. Vanlallawmi te an zai bawk.
FG&CC hian Pastor leh Kohhrana rawngbawltu pawimawh (Church Leader)-te pualin Counselling Training a buatsaih thin a. Pastor-te pual hian kum 1992 atang khan buatsaih thinin Pastor 577 training chhuak an awm tawh a ni.
Synod hian Counselling Centre pakua a nei mek a, heng Counselling Centre pakuaah hian October 8, 2024 thlenga pantu (client) an neih tawh zat chu 78,040 a ni a, kumin 2024 bikah mi 5,251 an nei tawh a ni.