Vawiin (Nov. 29, 2024) hi Kohhran Hmeichhe Ni vawi 28-na a ni a, Presbyterian Kohhran Hmeichhiate chuan hemi pual hian Bial leh Kohhranah tha an tih angin programme an hmang ang. Kumin Kohhran Hmeichhe Niah hian thupui inang tlang, ‘Sister Lianchhungi chanchin’ Pi Sailuti ziah chu an zir dawn a ni.
Kohhran Hmeichhia hi Zosap, Rev. D.E. Jones-a nupui Mrs. Catherine Ellen Williams (Pi Zosaphluii)-in kum 1904-ah a din a. Mizo hmeichhia, a bik takin nu te chu Pathian thu te hrilhin, kut themthiam leh hriselna lam te a zirtir a. Khasi nu Pi Siniboni pawh amah puitu tangkai tak a ni a, hun kal zelah Bible Women-te nen thawk hovin Kohhran tinah Kohhran Hmeichhia a lo ding zel a ni.
Kohhran Hmeichhe Inkhawmpui Lian-in Kohhran Hmeichhe Ni bik neih a rel a, Synod Executive Committee (SEC)-in November thla Zirtawpni hnuhnung ber hi Kohhran Hmeichhe Ni atan hman ni se tia a relsak angin, kum 1997 atang khan hman tan niin, Synod Calendar-ah pawh Synod Ni pawimawh zingah dah tel a ni.
Kohhran Hmeichhe Ni atana November thla Zirtawpni hnuhnung ber hman a nih chhan hi Pu Zosaphluia'n a diary-ah Pi Hluii'n zirtawpniah Hmeichhiate chu inkhawm a neihpui thin tih a ziak a. Inkhawm a neihpui tan ni chiah hi sawi lan a ni lo va, January 1904-ah Mizorama lo chhuak kha a ni a. A lo chhuah kum tawp lamah chuan Hmeichhiate hi bul a tanpui tawh ngei ang tih a rin theih a. Chuvangin Pi Zosaphluii Mizorama a lo chhuah kum tawp lam November thla Zirtawpni hnuhnung ber chu Kohhran Hmeichhe Nia hman turin Synod Executive Committee (SEC) chuan rem tiin, kum 1904 chu Kohhran Hmeichhe din tan kumah a pawm nghal bawk a ni.