Vawiin (Dec.3, 2024) atang hian Synod Inkhawmpui vawi 101-na chu Mission Vengthlang Kohhran Biak Inah neih tan a ni ta. Inkhawmpui hian Dec. 8, 2024 (Pathianni) thleng a awh ang.
Synod Inkhawmpui hi kum 2010 atang khan Bial-in an thleng tan a, kumin 2024 hian Mission Vengthlang Bialin Mission Vengthlang Kohhranah an thleng a ni.
Vawiin chawhma dar 9:30 atang khan Nomination Committe an thu tan a, tlai dar 4:00 thleng a awh ang. Zan dar 6:30-ah vantlang Pathian biak Inkhawm neih a ni ang a, hetah hian inlawmna leh Kohhran chanchin reports ngaihthlak a ni ang.
December 4, 2024 (Nilaini) chawhma dar 9:30 atangin Synod Rorel tan a ni ang. Tun tumah hian general agenda 35 awmin, SEC/Boards atanga thu lut eng emaw zat a awm bawk. Synod Rorel hian December 7, 2024 (Inrinni) thleng a awh dawn a ni.
Kumin Synod Inkhawmpui Thlarau lam thupui chu 'Lalpa kawng buatsaih' (Isaia 40:3-5) a ni a, December 7, 2024 (Inrinni) zanah Rev. C. Saikapa, Khatla-in thupui hi a sawi ang.
December 8 (Pathianni) chawhma chu Pastor nemngheh leh Pro. Pastor ruat inkhawm a ni ang a. Chawhnu chu Lalpa Zanriah Sakramen inkhawm a ni ang a, zan Inkhawmah Moderator valedictory sermon ngaihthlak a ni bawk ang.
Kumin 2024 Synod Inkhawmpuia Puipa turte chu heng te hi an ni :
Moderator : Rev. R.C. Lalnghakliana
Secretaries : Rev. P.B. Mankima (Sr.)
Upa Vanlalsawma Siakeng (Jr.)
Finance Officers : Rev. V.L. Luaia Hranleh
Rev. P.C. Pachhunga
Statistician : Rev. H. Laltlanthanga
Senior Exe. Secretary : Rev. C. Zorammawia
Executive Secretary : Rev. Dr. K. Lallawmzuala
Synod Inkhawmpuia vantlang Pathian biak inkhawm zawng hi Synod Information YouTube leh Hruaina Eng TV-ah te LIVE TELECAST a ni ang.
SYNOD INKHAWMPUI VAWI 101-NA : ROREL NI 1-NA
December 4, 2024 | Synod Information & Publicity
December 4, 2024, chawhma dar 9:30-ah inkhawmpui tan a ni a. Palai lawmna, inchhiarna, Synod pawn palai lawmna leh inkhawmpui chibai bukna neih a ni. He mi zawh hian Moderator tang lai Rev. R. Vanlalnghaka chuan Rev. R.C. Lalnghakliana hnenah Moderator nihna a hlan.
Nomination thu ngaihthlak a ni a, kum 2025 Synod Inkhawmpui programme leh puipa turte pawm a ni. Puipa turte chu
Moderator - Rev. John Raldosanga, Bethlehem Venglai
Secretary (Sr.) - Upa Vanlalsawma Siakeng, Ramthar Tlang Veng
Secretary (Jr.) - Rev. B. Zohmangaiha, MTC
Finance Officers - 1. Rev. Dr. K. Lallawmzuala, 2. Rev. Vanlalzuata
Statistician - Upa Dr. Vanlalzara, Khatla
Sr. Executive Secretary - Rev. V.L. Luaia Hranleh
Executive Secretary - Rev. Dr. Rosiamliana Tochhawng
Kum 2025, 2026 leh 2027 inkhawmpui thlengtu tur chu inkhawmpui hmasa lamah tihfel a lo ni tawh a. Kum 2028 Synod Inkhawmpui chu Republic Veng Pastor Bialin College Veng Kohhran Biak Inah an thleng ang.
Kum 2025-a Pastoral Ministry thupui atan 'Inpumkhatna' Johana 17:11 (b) pawm a ni a, Pro. Pastor pawh mi 14 lak tura pawm a ni bawk.
Pastor Bial thar 5 hawn tura pawm a ni a. Chu'ngte chu Mizoram chhungah Saikhawthlir Bial, Mizoram pawnah Ludhiana Bial, Amrapara Bial, Tarahara Bial leh Bangnan Bialte an ni. Hmarthlang, Kolasib leh Teirei Presbytery atangin Bairabi Presbytery thar hawn a ni bawk.
Minister, Pastor leh Pro. Pastor-te awmna tura Pastoral-in ruahmanna a siamte chu inkhawmpui hian a pawm bawk.
Tun tum inkhawmpuiah hian General 35 a awm a, ni khatnaa rel hmante chu -
GENERAL 1 : 'SMB member tharte Field tlawh tihtawp' rawtna, Teirei Presbytery atanga lut chu an rawtna angin tihtawp ni rawh se, tih a ni.
GENERAL 2 : Aizawl East Presbytery atanga lut, 'Biak Ina Kohhran hming ziah leh tar inang tlang' rawtna chu kan kal dan ngai hi a tawk e, tih a ni.
GENERAL 3 : 'PCI Emblem-a kraws dah tel' rawtna, Aizawl Bethel Presbytery atanga lut chu PCI General Assembly-ah thlen ni se, tih a ni.
GENERAL 4 : Ramlai Presbytery atanga lut, 'Cancer Hospital bula Synod Khualbuk siam' rawtna chu tha tih a ni a. SEC bawh zui tura dah a ni.
Dar 4:05-ah rorel zawh a ni a, Rev. Lalsangbera'n malsawmna sawiin rorel ni hmasa ber a tin.
SYNOD INKHAWMPUI VAWI 101-NA : ROREL NI 2-NA
December 5, 2024 | Synod Information & Publicity
December 5, 2024, chawhma dar 9:30-ah Rev. R.C. Lalnghakliana, Moderator-in Pathian thu Matthaia 16:16-19 a chhiar a. Dr. Lalthakima, Director, Synod Hospital-in tawngtaiin rorel inkhawm a hlan. Nomination thu ngaihthlaka pawm a nih hnuah ni hmasa lama rorel minute ngaihthlak a ni a, pawm a nih hnuah rorel ni hnihna tan a ni.
GENERAL 5 : 'Hnam dang Lal Isua ring lote hmachhawn dan' chungchang, Aizawl West I Presbytery atanga lut chu kan hmalak mekna a ni, tia inhrilhfiah a ni.
GENERAL 6 : Zoram Pawn Presbytery atanga 'India ram khawpui liana Biak In dinna tur sum dah' chungchang lo lut chu hmalak mekna a ni e, tia inhrilhfiah a ni.
GENERAL 7 : 'Naupang khawih khawloh enkawlna din' rawtna Aizawl Chhimthlang Presbytery atanga lo lut chu hei hi chu Sorkar kut a ni a, kan sawi hona hi a tawk e, tih a ni.
GENERAL 8 : 'Kristiante dodal zawnga thuthlukna siamah hmalak' chungchang Zoram Pawn Presbytery atanga lo lut chu kan hmalak mekna a ni a, SEC-in a tul angin hma lo la chhunzawm zel rawh se, tih a ni.
GENERAL 9 : Tuirini Presbytery thu, 'Home hrang hrang nasa zawka tanpui' chungchang chu an rawtna angin SEC bawh zui tura dah a ni.
GENERAL 10 : Tlawng Presbytery atanga lut, 'Synod Hospital-a B.Sc Nursing zirlaite tana Sponsorship/stipend pek' chungchang chu Hospital Board-in ruahmanna a siam hi kalpui phawt ni se, tih a ni.
GENERAL 11 : 'Kohhran beihna laka Kohhran mite him nana hmalak rawtna', Khawthlang Presbytery atanga lut chu kan hmalak mekna a ni e, tia inhrilhfiah a ni.
GENERAL 12 : Aizawl Chhimthlang Presbytery atanga, 'Nupa inthenna a ziaawm theih nana zirchian leh hmalak' rawtna chu kan hmalak mekna a ni e, tiin inhrilhfiah a ni.
GENERAL 13 : 'Sign language (zaizira inbiakna) hman tel' chungchang Aizawl Central atanga lut chu Kohhran malin a tul huna hman mai tur a ni e, tih a ni.
GENERAL 14 : 'Pêm lehkha leh Testimonial neite inang tlanga kalpui', Tuivai Presbytery atanga rawtna lut chu inkaihhruaina neih sa hi tha taka zawm tlang tura infuih a ni.
GENERAL 15 : Aizawl Central Presbytery atanga lut, 'Kristian Chhungkaw din kawnga chak zawka hmalak' rawtna chu Kohhran tinten he mi kawngah chak zawka hma lak zel ni se, tih a ni.
GENERAL 16 : 'Synod hnuaia hna lakah Theological Graduate-te tana kum ngaihhnathiam' rawtna Aizawl Bethel Presbytery atanga lut chu kan kal dan ngai hi a tha e, tih a ni.
GENERAL 17 : Aizawl East Presbytery atanga, 'Statistic form-a Innei zat ziahna column siam' rawtna chu tha tih a ni a. 2025 atanga hman tan ni se, SEC-in lo bawh zui rawh se, tih a ni.
GENERAL 18 : 'Synod Hostel inenkawl dan en that', Tuichangral South Presbytery atanga rawtna lo lut chu SEC-in a tul angin hma lo la zui rawh se, tih a ni.
Dar 3:30 pm-ah rorel zawh a ni a. Minute ngaihthlak a ni a, pawm a nih hnuah Upa Paukhogin Singto, Madanriting chuan tawngtaiin rorel a tin.
SYNOD INKHAWMPUI VAWI 101-NA : ROREL NI 3-NA
December 6, 2024 | Synod Information & Publicity
December 6, 2024, chawhma dar 9:30-ah Rev. R.C. Lalnghakliana, Moderator-in Pathian thu Sam 90:1&2 a chhiar a. Upa Sanghmingthanga Sailo, Khawzawl Vengthar chu tawngtai turin a sawm a. A tawngtai zawhah rorel tan a ni.
GENERAL 19 : Aizawl Chhimthlang Presbytery atanga lut, 'Naupangte thuawih zirtir' chungchang chu SEC lo bawh zui atana tih a ni.
GENERAL 20 & SEC THU : 'Nau neih chawlh rei zawng en that' rawtna Aizawl Hmarchhak Presbytery atanga lut leh SEC 309:109, 'Synod hnuaia thawktute Maternity Leave tihpun' rawtna chu sawi kawp niin, SEC atanga rawtna angin maternity leave hi ni 180 ni tawh se, 2025 atanga hman tan tura rem tih a ni.
GENERAL 21 : Aizawl West II Presbytery atanga lut, 'SMTC-a Communication Skills Course hawn' chungchang chu sawi hona a tawk e, tih a ni.
GENERAL 22 : 'Kristianna humhim kawnga nasa zawka hma lak', Aizawl Bethel Presbytery atanga rawtna chu kan sawi hona a tawk e, tih a ni.
GENERAL 23 & 24 : Aizawl Hmar Presbytery atanga lut, 'Synod Hospital tana charity fund lak khawm' rawtna leh Tuirini Presbytery atanga lut, 'Synod Hospital Charity Fund tana pawisa thawh' rawtna chu sawi kawp a ni a, Hospital dinhmun en that mek a nih avangin sawi hona hi a tawk e, tih a ni.
GENERAL 25 : 'Synod Hospital-ah Kohhran Upa harsate tana awm man zatve tumsak' rawtna, Chhimthlang Presbytery atanga lo lut chu kan kal dan pangngai hi a tha e, tih a ni.
GENERAL 26 : Hmarthlang Presbytery atanga lut, 'Kohhran Thurin IX-na' chungchang chu Thurin ennawn a ni zo chauh bawka kan sawi hona hi a tawk e, tih a ni.
GENERAL 27 : 'Cancer Hospital Chaplain Quarters neih' rawtna Aizawl Hmarchhak atanga lut chu hmalak mekna a ni e, tia inhrilhfiah a ni.
GENERAL 28 : Chhimchhak Presbytery thu, 'Ruihhlo tive lote ven kawnga hmalak' rawtna chu tha tih a ni a, SEC bawh zui tura tih a ni.
GENERAL 29 : 'Inkhawmpui lianahte thlengtu pual thawhlawm lak khawm' rawtna, Ramlai Presbytery atanga lo lut chu kan kal dan pangngai hi a tha e, tih a ni.
GENERAL 30 : Tuivawl Presbytery atanga, 'Kohhran Upa retreat neih' chungchang lut chu kan sawi hona hi a tawk e, tih a ni.
GENERAL 31 : 'Uchuak taka taksa pholan a reh theih nana hmalak', Tuichang Presbytery rawtna chu mahni Kohhranah theuh hmalak ni se, tih a ni.
GENERAL 32 : Champhai South Presbytery atanga lut, 'Lalpa Zanriah Sakramen theh' chungchang chu kan kal dan pangngai hi a tha e, tih a ni.
GENERAL 33 : 'MTC tihchangtlun' chungchang Tuirini Presbytery atanga lut chu hmalak mekna a ni e, tih a ni.
GENERAL 34 : Hmarthlang Presbytery atanga lut, 'Synod Transit Accomodation dah' rawtna chu a rem chang rih lo e, tih a ni.
GENERAL 35 : 'Sunday School kaikim chawimawina siam belh' rawtna Tuivawl Presbytery atanga lut chu tha tih a ni a, SEC bawh zui tura dah a ni.
SEC/BOARD atanga thu lutte :
1. Chhim Bial enkawl dan en that rawtna (SEC 303:56/2023; SEC 307:30/2024) chu hman nghal tura pawm a ni.
2. Assam Mission Field then chungchang (SMB 180:25(10); SMB 182:4(4); SEC 307:40) chu rem tih a ni a, thil tul dangte chu Synod Bu-a chuang hman turin SEC-in lo bawh zui rawh se, tih a ni.
3. Probationary Pastor lak dan en thatna (2023 Synod Gen. 7; SEC 306:14/2024; SEC 307:60/2024) chu pawm a ni a, SEC-in hman nghal turin lo chul mam rawh se, tih a ni.
Dar 4:20-ah rorel zawh a ni a. Minute ngaihthlak a ni a, pawm a nih hnuah Rev. Lalrinmawia, Khatla-in malsawmna sawiin rorel a tin.
SYNOD INKHAWMPUI VAWI 101-NA : ROREL NI 4-NA
December 7, 2024 | Synod Information & Publicity
December 7, 2024, chawhma dar 9:30-ah Rev. R.C. Lalnghakliana, Moderator-in Pathian thu Ephesi 5:15-17 a chhiar a. Upa John K. Gangte, Guwahati chu tawngtai turin a sawm a. A tawngtai zawhah rorel tan a ni.
SEC/BOARD atanga thu lutte :
4. Senior Department leh Puitling Sunday School inkara department thar siam rawtna (MSSU 169:VII of 23.10.2024) chu kan kal dan ngai hi a la tha e, tih a ni.
5. Synod Service Rules en that rawtna (SEC 308:43) chu tha tih a ni a. SEC-in lo bawh zui se, Synod-ah rawn thlen leh rawh se, tih a ni.
6. Kohhran (Synod) Inrelbawlna en that rawtna (SEC 308:44) chu hmalak mekna a ni e, tih a ni.
7. Mizoram Kraws Lian Synod Budget-a dah chungchang (SEC 308:74) chu tha tih a ni a, Finance lam bawh zui tura tih a ni.
8. Central KTP Leader thar atan Rev. H. Lalawmpuia, Sakawrtuichhun (SEC 309:6) an thlan chu pawm a ni.
9. Council of Churches in Mizoram puala Special Sunday siam rawtna (SEC 309:11) chu an rawtna angin October thla Pathianni vawi 4-na chu rem tih a ni.
10. Presbyterian English School (PES) tha zawka enkawl dan tur chungchanga rawtna (SEC 308:89; SEC 309:18) chu tha tih a ni a. SEC-in lo bawh zui se, Synod-ah rawn thlen leh rawh se, tih a ni.
11. PPF Dan 2014 en thatna (SEC 303:62/2023; SEC 307:51/2024) chu hman nghal turin SEC-in lo zut mam rawh se, tih a ni.
12. Nupa chungchang dan en thatna (Synod 2023 Gen. 42; SEC 306:35; SEC 309:4) chu siam that ngaite siam thain, hman nghal tura pawm a ni.
Finance report ngaihthlak a ni a, 2025-2026 Synod Budget ruahmanna ngaihthlak a ni bawk.
2023 - 2024 Statistics tlangpui chu heti ang hi a ni :
Presbytery - 47
Pastor Bial zat - 304
Kohhran zat - 1,160
Minister zawng zawng zat - 603
Kohhran Upa zawng zawng zat - 5,963
Kohhran member zat - 6,39,289 (3,09,056 + 3,30,233)
Secretary report leh Department report ngaihthlak niin, pawm a ni.
Chawhnu dar 3:00-ah inkhawmpui rorel zawh fel a ni a. Minute chhiarin, pawm a nih hnuah hming ziah a ni. Dar 3:27-ah Rev. Dr. H. Remthanga'n malsawmna sawiin Synod Inkhawmpui vawi 101-na rorel a tin.
For more Pics Click Here
Synod 2024 Bulletin 1 (Dec. 4, 2024)
Synod 2024 Bulletin 2 (Dec. 6, 2024)