Synod Inkhawmpui 2016 a tiak taSynod Inkhawmpui 2016 a tiak taMizoram Presbyterian Kohhran Inkhawmpui lian Synod Inkhawmpui vawi 93-na chu December 6 - 11, 2016 chhung khan Durtlang Kohhran Biak Inah tluang taka neih zawh a ni ta.
Synod Inkhawmpui hi Durtlang Bialin Durtlang Kohhran Biak Inah an thleng a, inkhawmpui palai chu 2107 an ni a, ram pawn leh PCI Synod hrang hrang atang te, Mizoram chhunga Kohhran dang LIKBK te, ECM te leh BCM atangte-in palai an lo tel bawk.
Tun tum Synod a puipate chu heng te hi an ni :
Moderator : Rev. Lalzuithanga
Secretaries : Upa H. Ronghaka (Sr.), Rev. Lianhmingthanga Sailo (Jr.)
Finance Officers : Rev. P.C. Pachhunga, Rev. H. Remthanga
Statistician : Rev. R. Lalchangliana
Executive Secretaries : Rev. Lalramliana Pachuau, Rev. B. Sangthanga
December 6, 2016 zan inkhawmah Palai lawmna leh report neih a ni a, Moderator kalchhuak tur Rev. H. Lalrinmawia'n palai lawmna thu sawiin kum 2016 chhunga Synod Report a pe a, report a a lan danin Mizoram Presbyterian Kohhran dinhmun tlangpui chu hetiang hi a ni:
1. Kohhran member zat 6,11,241
2. Dan zawhkim zat 4,20,043
3. Chhungkaw zat 1,29,698
4. Kohhran zat 1,197
5. Pastor Bial zat 300
6. Presbytery zat 53
7. Kohhran chhuahsan leh Pawl danga pakai zat 2482
8. Pawl dang atanga lo pakai zat 4,704
December 7, 2016 khan Rorel inkhawm tan a ni a, rorel tan hmain Moderator inthlakna hun hman a ni a, Moderator kal chhuak Rev. H. Lalrinmawia'n Moderator thar, Rev. Lalzuithanga hnenah Moderator mawhphurhna a hlan a, chumi zawhah inkhawmpui rorel tan nghal a ni a, Dec. 10, 2016 Inrinni thlengin rorel inkhawm neih a ni. Synod Inkhawmpui hian Kohhran pawimawhna inzirtir uar te, ram pum huapa social media chungchang zirhona neih te a rel a, ramthar field ah fimkhur zawka ram lei leh insak kalpui te, Myanmar a rawngbawlna kawng zawn te a rel a. Synod Hospitala Dental Unit din te, Colonoscope lei te leh damlo awmpuitute tana khualbuk sak te a rel bawk a. Synod Pem hruai dan te, Nupa chungchang Dan leh Kohhran pawl dangte nena kan inkungkaih dan te ennawnin a siam tha a, Minister/Pastor hna bansan te chungchang kaihhruaina a siam thar bawk. Heng bakah hian thu pawimawh chi hrang hrang rel a ni bawk. Kum 2017 - 2018 Synod Bugdet atan Rs. 2,49,39,63,000/- chu pawm a ni.
Inkhawmpui chhung hian zan lamah Pathian biak inkhawm neih thin a ni a, Pathian thuchah ngaihthlak thin a ni a, Zaipawl, Synod Choir te, Synod Mission Choir te leh Bial zaipawl hrang hrang te an zai thin bawk.
December 10, 2016 (Inrinni) zan inkhawmah kumin Synod Inkhawmpui thlarau lam thupui 'Kohhran Inpumkhatna' (Ephesi 4 : 1 - 3) chu Rev. Chuauthuama, Ramhlun Vengchhak-in a sawi. Dec. 11, 2016 (Pathianni) chawhma inkhawm chu Pastor nemngheh inkhawm a ni a, Pastor atan mi 19 nemngheh niin Pro. Pastor tur mi 17 dah ngheh an ni bawk. Chawhnu inkhawmah Synod Moderator Rev. Lalzuithanga'n Lalpa Zanriah Sacrament a theh a, kum 2016 chhunga Minister thi pahnih - Rev. Chawnghmingliana, Zamuang leh Rev. Vanlalfaka, Chawnpui te sunna hun hman a ni bawk . Zan inkhawmah Moderator kal chhuak Rev. H. Lalrinmawia'n Valedictory Sermon a sawi.
Kum 2017 Synod Inkhawmpui chu November 29 - December 10, 2017 chhungin Bungkawn Kohhran Biak In-ah nghah a ni ang a, Bungkawn Bialin an thleng ang. 2017 Synod Inkhawmpuia Puipa turte chu heng te hi an ni:
Moderator : Rev. F. Lalrinnunga, Moderator
Secretaries : Rev. Lianhmingthanga Sailo (Sr.), Chawnpui; Upa R. Dengzikpuia (Jr.), Maubawk
Finance Officers : Rev. P.C. Pachhunga; Rev. H. Remthanga, Mission Veng
Statistician : Upa Dr. Vanlalhluna, Dinthar
Executive Secretaries : Rev. Lalramliana Pachuau; Rev. B. Sangthanga