Synod Hospital, Durtlang chuan nimin (Jan. 23, 2017) chawhnu dar 1:00 khan Oath Taking & Lamp Lighting Ceremony vawi 43-na, Synod Hospital Chapel-ah an hmang a, Rev. Lalzuithanga, Synod Moderator chu Khuallian a ni.
Programme hi Dr. Lalbiaksanga Hnamte leh Pi Rongurliani ten kaihruaiin Synod Hospital Director Dr. L.H. Thanga Singson-in inlawmna thu a sawi a, Pi R. Lalrohlui, Ward Sister-in Bible chhiar leh tawngtaiin hunserh a hmang a. Pi C. Lalrintluangi, Principal-in Nursing School Report a pe a, Miss R. Lalchhanhimi, Nursing Superintendent-in Oath Taking leh Lamp Lighting hun a hmang a, First Year GNM-te Group zai ngaihthlak a ni a, Khuallian Rev. Lalzuithanga'n thuchah sawiin kum 2016 Mizoram Nursing Council Examination a pass chhuakte hnenah chawimawina a hlan a ni. Pi C. Thankhumi, Vice Principal-in lawmthu sawina hun a hmang a, Rev. H.C. Khaicho, Hospital Chaplain-in Malsawmnain inkhawm a tin a ni. He hun hman zawhah hian thingpui ruai kilho nghal a ni.
Synod Hospital hi kum 1928-a din kha a ni a, a din rual hian Nursing School hi din tel nghal a ni. Nurse zir hmasa ber chu Nl. Khuangi, kum 16 mi a ni. Hetih lai hian Nursing School hi Doctor te leh Pi Tlâwmkûngi (Mizo nurse hmasa ber te zing a mi) ten zirtir hna hi an thawk thin a ni. January 7,1929 ah Nurse Pi Hmangaihi, Sap ram atangin a lo chhuak a, a ni hian damlo enkawl hna thawk chungin Nursing School hi kum 7 chhung a enkawl tel bawk a ni. Kum 1938-ah Pi Puii (G.P. Roberts) a lo chhuak leh a; a ni pawh hian Damdawi In enkawl bakah Nursing School a enkawl tel bawk a ni.
Kum 1954-ah Pi Muani (Miss Maybounds) a lo chhuak ve leh a, Nurse te leh Nursing School a enkawl chhunzawm ta a; kum 1968-ah rambuai avangin an ram lamah an haw leh ta a ni. Rambuai avanga Zosap te an haw hnuah Pu Biakliana (1968 - 1972), Pi Lalzikpuii, Nursing Superintendent (1973 -1992), Pi Ramfangzauvi, Principal (1993 - 2002), Pi C. Lalrintluangi, Principal (2003 - 2012), R. Lalchhanhimi, Principal (2013 - 2016) leh C. lalrintluangi, Principal (2017 - till date) ten an enkawl chho a ni. Synod Hospital, Nursing School hi kum 1944-ah Indian Nursing Council-in a recognise a, GNM Course hi kum 3½ chhung zir a ni thin a. Kum 2015 October atangin kum 3 chhung zir turin Indian Nursing Council-in Syllabus an rawn siam ta a ni.
Synod Hospital, Nursing School atanga zir chhuak tawh zawng zawng hi an vaiin mi 1031 an tling ve tawh a ni. Synod Nursing School hi Principal pakhat, Vice Principal pakhat leh Sister Tutor 10-in an enkawl mek a, tunah hian zirlai 118 an awm a ni. Kum 2016, September khan Mizoram Nursing Council Exam-ah result tha tak an nei a ni. 1st Year GNM - Top 10 a lang zat - 3, 2nd Year GNM - Top 10 a lang zat - 2, 3rd Year GNM - Top 10 a lang zat - 5
Nursing School, Principal Office, Classroom leh Library te hi November 14, 2016 atang khan Student Hostel hlui lamah sawn a ni.