Vawiin (Jan. 27, 2017) chawhnu dar 1:00 khan Synod Committee Room No. 1-ah MPF Governing Board Meeting vawi 31-na neih a ni.
Meeting hi MPF President Rev. Lalzuithanga’n a kaihruai a, General Secretary Report leh Finance Report ngaihthlak a ni a, Annual General Meeting tluang taka neih a nih thu leh palai 260 vel an kal thu te, Office Assitant thar neih thu te, MPF President thar Rev. Lalzuithanga’n December 19, 2016 khan President mawhphurhna a lak thu te, MPF Governing Board Vawi 30 : 5-na in a rel angin Inrelbawlna tha (Good Governance) Campaign hmun hrang hrangah neih a nih thu te, District Forum hruaitute leh Kohhran hruaitute inkawmhona neih thu te ngaihthlak a ni.
Tun tum meeting-ah hian MPF Media Cell siam chungchang te, Resource Person-te tana training buatsaih chungchang te, Good Governance Seminar kalpui zel dan tur te, Centrally Sponsor Scheme (CSS) Guidelines zir ho dan tur te chu an thu ngaihtuah tur langsar zualte an ni.