Vawiin (Feb. 4, 2025) chawhma khan Synod Office, Devotion Hall-ah Synod Literature & Publication Board (SL&PB) buatsaih ‘Bible Thu Hlawmte (Topical Bible)’ tih chu Rev. R.C. Lalnghakliana, Synod Moderator-in a tlangzarh.
Tlangzarh inkhawm hi Rev. Dr. K. Lallawmzuala, Executive Secretary i/c SL&PB-in a kaihruai a, Rev. R.C. Lalnghakliana, Synod Moderator chuan lehkhabu thar chu a chhiartu apiangten Thlarau lamah hlawkna an hmuh theuh theihna tura tlangzarhin, Pathian hnenah tawngtaiin a hlan. Rev. P.B. Zosapthara, SL&PB Editor-in inhmelhriattirna neiin, lehkhabu buatsaih dan leh nih phung tlangpui a sawi a. Kum 2013 October thlaa SL&PB Board Executive Committee (BEC)-in Topical Bible Concordance siam a rawtna chu SL&PB committee-ah a thlen a. SL&PB Committee chuan rawtna chu pawmin, hma la zui turin BEC chu a ruat leh a. BEC chuan bawh zui turin Sub-Committee a din a ni. Kum 2022 May thlaa SL&PB BEC thu khawm chuan Topical Bible Concordance Project chu thar thawh leh a rel a, a project hming pawh ‘Bible Thu Hlawmte’ tih a ni a. A buaipui tur hian Upa C. Lalbiaknunga, Durtlang North chu ruat niin, ani hian lehlin leh thil tul dang zawng zawng chu a buaipui ta a ni.
‘Bible Thu Hlâwmte’ hi Orville J. Nave-a buatsaih Nave’s Topical Bible behchhana siam a ni a, phêk 2244-a chhah a ni a, thumal/thu hlâwm thlûr bing (entry word) hi 4,628 a awm a, thumal (word) awm zawng zawng hi 15,37,759 a ni bawk. Bible Thu Hlawmte (Topical Bible) hi Mizo tawnga kan la neih loh a ni a, lehkhabu rotling leh tangkai, rawngbawltute leh Pathian thu hriat fiah lehzual duhte tana belhfakawm a nih a rinawm.