Kristian Thalai Pawl
ECM KTP Inkhawmpui Vawi 63-na, January 30-2 February, 2025 chhunga New Laty-a neihah Central KTP aiawhin T.Upa Rinsailova Sailo, Treasurer leh Nl. F. Lallianzuali, Committee member te an kal.
Finance
February 1, 2025 (Inrinni) khan Chanmari Kohhranah Accounts Training neihpuiin thawktute, Pu Zaihmingthanga Fanai, Upa Lalrosanga Kawlni leh Upa Vanlalrawna Khiangte te an kal.
MSSU
February 1, 2025 (Inrinni) khan Zemabawk South Kohhranah Sunday School zirtirtu training neihpuiin MSSU trainer-te, Upa C. Lalbiaksanga leh Upa R. Lalmuanpuia te an kal.
Social Front
February 4, 2025 (Thawhlehni) chawhnu dar 1:30 khan SAD Conference Hall-II, MINECO-ah Social Welfare, Tribal Affairs & Women and Child Development Department huaihawtin National Commission for Scheduled Tribe hotuten Mizoram an rawn tlawh tur denchhenin Kohhran hrang hrang aiawhte inhmuhkhawmna neih a ni a. He hunah hian Scheduled Tribe Kristian-ten hamthatna dawn tur ang kan dawn loh thu te leh Kristiante nekchep kan nih dan te sawi ho a ni a, National Commission lo kal hunah pawh Kohhran hrang hrangte pheikhai rual taka ke pena hma lak dan tur sawi ho a ni bawk.
He inhmuhkhawmnaah hian Synod aiawhin Pu Albert Lalhmangaiha, Asst. Co-ordinator, Synod Office leh Pi Lalbiaktluangi, Superintendent, Hmangaihna In te an tel a ni.
Mizoram Christian College (MCC)
1. Mizoram Christian College, Vice Principal ni lai Dr. Lalthansanga C. chu Mizoram University hnuaia a thawh tak avangin MCC Governing Board vawi 36-na chuan MCC Vice Principal atan Dr. Benjamin Lalfakzuala, Assistant Professor, Department of Political Science chu a ruat a. Vice Principal mawhphurhna hi February 1, 2025 atanga January 31, 2027 thleng a chelh ang.
2. Mizoram Christian College chuan kum tina an tih thin angin January 29 - February 1, 2025 chhung khan ‘Rural Expedition’ neiin Khawbelah hun an hmang a. Rural Expedition hi 6th Semester Arts zirlaite tana buatsaih a ni a, zirlaite chuan thingtlang nun dan zirin loah an feh a, hna chi hrang hrang an thawk thin. Khawbel-ah pawh hian YMA hnatlangah te an thawk chhuak ve a, thing eh, mau chik, hlo thlawh leh thil dang tam tak an zir a ni.
Rural Expedition 2025-a kalte hi Khawbel Presbyterian Kohhran chuan lo mikhualin thlen In an lo siamsak a, zirlai 39 leh zirtirtu panga an kal thei a ni.
3. Mizoram University chuan nikum kum tawpa Odd Semester Exam Result a tichuak a, hetah hian Mizoram Christian College pawh a ti tha pawlah a tel a. Result tlangpui chu hetiang a ni:
MCC zirlai exam zawng zawng zat 292 atangin 239 (81.85%)-in an pass a. National Education Policy (NEP) hnuaia Arts Streams-ah 1st leh 3rd Semester exam-a MCC pass percentage chu 83.78% a ni a, hetah bik hian MCC hi Mizoram pumah Pahnihna an ni. Tin, Commerce Stream-ah pawh MCC pass percentage hi 86.27% niin; Mizoram University hnuaia Commerce zirna College pariat zingah Pahnihna an ni.
MCC zirlai Arts 3rd Semester leh BBA 5th Semester exam zawng zawngte an pass vek bawk.