Vawiin (Feb. 2, 2017) chawhma dar 10:00 khan Synod Office-a JM Lloyd Hall-ah Synod Ramthar Board Committee vawi 158-na a thu.
Committee hi Synod Moderator Rev. Lalzuithanga’n a kaihruai a, Secretary Rev. K. Lalrinmawia'n reports a pe. Tun tum committee-ah hian thu pawimawh tak tak 12 zet ngaihtuah tur an nei a ni.
Thu ngaihtuah tur zinga langsar zualte chu - Gilakutta Mission School non-formal-a kalpui mek, formal school-a dah thu te, Synod Home Mission South (SHMS) Kawrthindeng Primary School atanga Middle School-a upgrade thu te, Home Mission North-a Bru Gospel Team dinhmun tihchian thu te, United Churches of Cambodia (UCC) hruaitute kan Kohhran zir tura Mizorama an kal phalsak rawtna te, Bagha-a School din chungchang te, PMS Gharmurra upgrade chungchang te, Masihi Sangati Kendra hnuaia thawkte In luah man enthat rawtna te, Synod Mission Board hnuaia thawk chhunzawm lote Gratuity pek chungchang te, Tripura-a Synod ram lei belh chungchang te an ni. Secretary Report atanga a lan danin Synod Inkhawmpuiin Ramthar Field-ah Bial thar 4 hawn a remtih angin tluang taka hawn tawh a ni a, Mission Field Secretary atan mi 4 ruat thar an ni a, mi 2 ruat nawn an ni. Pastor nemngheh thar leh thawk lai zing atangin Field-a Pastor Bial vawng tur mi 9 ruat an ni a, Induction Service neihpui an ni tawh bawk.
Board Executive Committee (BEC) in kum 2017-2018 chhung a mi tur Synod Mission Choir member a ruat tharte chu January 24, 2017 khan Rev. K. Lalrinmawia, Board Secretary-in Masihi Sangati Kendra Chapel, Bawngkawnah Pathian hnenah a hlan a. Ramthar Board Committee-in a remtih angin thawktute thawhna hmun siamrem a ni a, Field chhung transfer zat 22, Inter Field transfer zat 40 leh Contract Missionary transfer zat 73 an ni.