February 18, 2025 (Thawhlehni) zing dar 5:00 khan Pi Lalêngzuali, Staff Nurse, Joypur (Barak Area) a thawk mek chu JJIMS, Silchar-ah a boral a, vawiin (Feb. 19, 2025) chhun dar 12:00 hian Rev. R. Lalhmingsanga, Secretary, Synod Mission Board-in Thuampui Vengah a vui ang.
Pi Lalêngzuali (Maêngi) hi Pu Rualthanga (L) leh Pi Zathluaii te fa pasarih zînga a naupang ber dawttu niin, ni 31.12.1973 khân N. Vanlaiphaiah a piang a. Nutâ pakhat leh laizâwn panga a nei. An chhûngkua hi kum 1985-ah Thuampui Vengah pêm thlain, an inbengbel zui a. Ni 10.1.2019 khân a pa a lo sûn tawh a ni. Aizawl pa lâr, Hawaiian Guitarist - Pu Dengrikhuma, Tlangnuam fapa, Pu Hmingthanmawia, TBZ Missionary nên ni 11.5.2010 khân Lucknow-ah an innei a, fanu pakhat, Ruthi Ramdinpuii (kum 13) an nei. An inneih hnuah hian a pasal hian a hna chu bânsanin a nupui rawngbâwlna chu a tâwiâwm ta zâwk a ni.
Primary School hi N. Vanlaiphaiah zirin, Middle leh High School hi Zemabawkah a zir a; B.A. hi Govt. Aizawl North College atangin a zo va. Tin, missionary-a a chhuah hnuah Duncan Hospital, Raxaul (Bihar)-ah GNM (Nurse) a zir zo leh bawk.
Pi Maêngi hi a naupan têt atangin nu leh pa thu âwih thei tak a ni a. Mi zakzum tak, nunnêm tak, tawng tam lo, taima tak leh tlâwmngai thei tak a ni. A nu leh pa, a bîkin, a nu hi Pathian tih tak mai leh tawngtai mi a ni a. An unau pawh hi rinna kawngah a kaihruai nasa hle. Hei vâng hian Pi Maêngi pawh hi kohhran bêl tlat mi, a theih tâwpa kohhrana inhmang mi niin, hun puma rawngbâwl tûra a inpêkna kawngah pawh a nu leh pa te kaihhruaina hian kawngro a su hle a ni.
Thuampui Kohhranah KTP-ah a inhmang êm êm thîn. Kum 1993-1996 chhûngin Committee member leh Office Bearer chanvo hrang hrangte a chelh a ni. B.A. a exam dâwn hian Pathian hnênah B.A. tha taka a pass chuan missionary-a kal tûrin a inhlân a. Pathian zârah tha takin B.A. a pass a. Missionary Training Centre, Mission Vengthlangah kum 1998 khân Missionary Pre-Service Training a zo a. A û, Australia-a hnathawka awm chuan a awmna lama chhuk ve tûrin a rawn sâwm a. Ani erawh chuan, “Pathian lamah ka kâ ka âng tawh,” tiin, ni 5.1.1999-ah chuan Synod Mission Board hnuaiah missionary hna a zawm ta zâwk a ni. Thuampui Kohhran atanga missionary chhuak hmasa ber a ni a, kohhran pawhin a ngaihlu hle a ni.
Missionary hna a thawh chhûngin hêng hmunahte hian a awm a ni: Evangelist Teacher-in Noagang (Tripura), 1999-2001-ah; Evangelist Teacher-in Sarihajan (Karbi Anglong). Jan. - Aug., 2002-ah; GNM zirin Bihar, Sept., 2002 - March 2006-ah (hetah hian Synod Hospital, Durtlanga internship a tih chhûng a tel); Staff Nurse-in Garhi (Lucknow), April 2006-2013-ah; Staff Nurse-in Bhorle (Nepal), 2014-2016-ah; Staff Nurse-in Tuipuibari (HMN), 2017-ah; Staff Nurse-in Winchester (Cachar Tlangram), 2018-2022-ah; Staff Nurse-in Joypur (Barak Area), 2023 atanga a thih thlengin.
Missionary hna a thawh chhûngin thahnem a ngai thei hle a; tin, a thawhpuite leh a thawhnaa mite ngainat a hlawh thîn hle. Mi dangte chanchin chhe lai a sawi ngai lo va, mi pawi sawi a hlau hle. Fianriala Bible chhiar leh tawngtai a ngaina a, thlarau mi tak a ni. Pathian faka zai leh lâm ngaina tak a ni bawk. A pasal leh fa te tâna nu nih tling tak a ni.
October 2024 khân Aizawlah Endoscopy tiin, Chronic Gastritis an ti a. A thawhnaah an haw thla a, a pum a puar zêl a. Ni 26.12.2024 khân Jeevan Jyoti Institute of Medical Sciences (JJIMS), Silchar-ah admit a ni a. CT Scan atangin Chronic Liver Disease a ni tih an hmuchhuak a. Ni 31.12.2024-ah an hâwng a; a hnuah vawi hnih entîr leh a ni a. A pum a la puar avângin ni 30.1.2025 khân siak tûrin admit leh a ni a. Ni 2.2.2025 khân a puma tui litre thum an siak a, a tûkah damdawi in atangin an chhuak a. Amaherawhchu, a chauh tâk êm avângin Joypur an thleng zo ta lo va. Silchar Mission Compound-ah Pu Lalrinawma, Headmaster, OHS quarters-ah an awm ta a. A kal theih loh bâkah thil a ei mumal thei lo va; tichuan, kâr hnih an awm a. Ni 16.2.2025 (Pathianni)-ah chuan JJIMS, Silchar-ah bawk chuan admit a ni leh ta a. Hemi zân hian ICU-ah dah niin, a dinhmun a hniam ta zel a. A thin tha lo (Liver Infection) hi a lo nasat tawh êm avângin doctor leh nurse-ten theih tâwp an chhuah chungin ni 18.2.2025 zîng dâr 5:00 khân Lalpan a hnêna châwl tawh tûrin a lo hruai ta a ni.
Pasal a neih hnuah Tlângnuam Kohhran mi a lo ni a. Amaherawhchu, amah hian a thih hma khân Thuampuia phûm a duh thu a lo sawi chu zah thiam takin a pasal leh a chhûngten an remtihsak a, Thuampuiah hian vui a ni dawn ta a ni.
VUI PROGRAMME
A hun : Ni 19.2.2025 (Chhûn dâr 12:00)
Vuitu : Rev. R. Lalhmingsanga, Secretary, Synod Mission Board
A hmun : Pi Zathluaii In, Thuampui Veng
Chanchin sawi : 1) Upa Lalthahluna Ralte, Coordinator, Synod Mission Board
2) Chhungkaw aiawh
Chhûngkaw tâna tawngtai : Rev. Dr. Rosiamliana Tochhawng,
Executive Secretary i/c Ramthar
Hla : Ni tin Isua ka thinlungin (KHB No 61)
Malsâwmna :
Thlânmualah : Rev. Lalremliana, Bialtu Pastor