February 25-27, 2025 chhung hian Synod Executive Committee vawi 312-na chu J.M. Lloyd Hall, Synod Office-ah neih mek a ni a, member 141 an kal.
Meeting hi Moderator, Rev. R.C. Lalnghakliana’n a kaihruai a, Upa Vanlalsawma Siakeng, Synod Secretary-in report a pe a, Rev. Dr. K. Lallawmzuala, Finance Officer-in report a pe bawk.
Secretary report-ah hian Synod inkhawmpui vawi 101-na tluang taka hman a nih thu te, pastor Bial thar hawn a nih thu te, Pastor leh Pro. Pastor Induction neih a nih thu te, Pro. Pastor Orientation neih a nih thu te, CCM Working Committee member ruat a nih thu te, BD zir tur lak thar a nih thu te leh RC leh RL pek chhuah dan te tarlan a ni.
Tun tumah hian thurel tura chhawp chhuah 52 a awm a. Chung zingah chuan Cancer Hospital bula Synod Khualbuk siam rawtna te, Sunday School kaikim chawimawina siam belh rawtna te, Synod Service Rules enthat rawtna te, PCI Centenary Jubilee 2026 lawmna tur chungchang te, Kohhran Hmeichhe Inkhawmpui Lian Chairman leh General Secretary chungchang te, MSSU zirlai bu English-a lehlin dilna chungchang te leh Unity Gastro & Liver Hospital, Tripura recognized dil belh chungchangte chu a langsar zualte an ni.
For more Pics Click Here