February 28 - March 2, 2025 chhung khan KTP Rorel Inkhawm vawi 11-na chu Chawnpui Kohhran Biak Inah neih a ni a, rorel palai 933 an ni.
Rorel Inkhawm tan zanah Palai lawm leh report inkhawm a awm a, hemi hunah hian Upa Vanlalsawma Siakeng, Synod Secretary-in kum 2025-2026 Kumpuan “Zirna leh Rawngbawlna” tih chu hawngin Pathian hnenah a hlan a, report pathum - General Secretary report, Finance report leh Bial report khaikhawmna ngaihthlak a ni.
March 1 (Inrinni) nilengin Rorel inkhawm neih a ni a, Rorel hi Rev. H. Lalawmpuia, Central KTP Leader-in a kaihruai a ni. Inrinni zan, Pathianni chawhma, chawhnu leh zanah te vantlang Pathian biak inkhawm a awm bawk.
March 2024-February 2025 chhung report-a a lan danin, Central KTP hnuaiah Bial 223 a awm a, Branch 907 awmin member zawng zawng 1,77,548 (mipa 1,07,535 leh hmeichhia 70,013) an awm a ni.
Thurel tlangpui te:
1. YRC puala Bial Budget siam.
2. Hospital Charity Fund pualin, tum khat inkhawm thawhlawm lak khawm.
3. YRC pualin tum khat inkhawm thawhlawm lak khawm.
4. Chhawmdawlna pualin tum khat inkhawm thawhlawm lak khawm.
5. Ruihhlo Do chhunzawm.
6. Street Ministry neih leh.
7. Kum 2026-2027 KTP Kumpuan Thupui atan “Chhungril takna (Sam 51:6)” thlan a ni.
Kum 2027-a KTP Rorel Inkhawm neihna hmun tur chu Kulikawn Kohhran Biak In a ni ang.