February 28, 2025 (Zirtawpni) khan YRC Convention Centre, Falkland Veng, Aizawl ami chu Synod Moderator Rev. R.C. Lalnghakliana'n a hawng.
Hawnna Programme hi Central KTP Leader Rev. H. Lalawmpuia'n a kaihruai a, Pu Nicholas Lalbiakzuala, Secretary, YRC Sub-Committee-in report a pe a, Rev. Dr. Rosiamliana Tochhawng, Executive Secretary i/c KTP leh hruaitu hlui mi eng emaw zatin thu an sawi a. He hunah hian Tv. Lalthlanawma, Praise On 2024 Pakhatna leh Mizoram Synod Choir te an zai bawk.
Convention Centre hi 2019 atang khan sak tan a ni a, convention centre building hi square meter 3,509 a ni a, mi 900 leng thei tura ruahman a ni. Centre Building-ah hian Synod Choir Cabin, mi 100 riah theihna, dining hall, choka, restaurant, committee room leh chowkidar quarters te a awm bawk. Central KTP leh Lushai Engineers ten thawh hona thuthlung an siam angin Lushai Engineers ten a sak hna an thawk a, a sak nan hian Rs.8,44,28,280/- sen a ni.