March 7-9, 2025 chhung khan Presbyterian Kohhran Hmeichhe Inkhawmpui Lian, vawi 51-na chu Lothazawl Field, Thenzawlah neih a ni a, thupui “Rinawmna” niin Speaker Upa Lalnunpuia Hrahsel a ni. Rorel Palai 1213 an kal thei a, chhinchhiah chinah Inkhawmpui Liana kal mi 8294 an ni a, in-report lo eng emaw zat an awm bawk.
March 7 (Zirtawpni) zanah Palai lawmna leh Report inkhawm a awm a, inrinni nilengin Thenzawl Field Veng Kohhran Biak Inah Rorel a ni a, Rorel hlan hian Pandal-ah inkhawm a awm a, inrinni zan atanga Pathianni zan thlengin vantlang Pathian biak inkhawm a awm a ni. Kristian chhungkaw dinhmun tehna pakhatna chu N. E. Khawdungsei bial a ni.
Inkhawmpui rorel tlangpuite:
1. Synod Hospital, Durtlang Charity Fund leh John Williams Hospital, Lunglei tanpuina pualin vawi khat inkhawm ve ve thawhlawm lak khawm.
2. Ram pum huapin kan tu leh fate Biak Ina hruai uar leh zual tura inzirtir.
3. Zuk leh hmuam do.
4. Plastir bawlhhlawh paih/tihral dan tha uar zawka inzirtir.
5. HIV/AIDS natna hlauhawmzia inzirtir.
6. Ram tluk chhiatna thlen mektu sual hnathawh do let turin, Central Kohhran Hmeichhiaten Trainers Training neih thin ni rawh se, tih te an ni.
Inchhiarna lam (January – December 2024) - Bial leh Kohhran mal zawmtu 222 an awm a, Kohhran leh Branch Church 996 an awm bawk. Chhungkua zawng zawng 1,22,875 a ni a, Ni tin chhung inkhawm nei thei chhungkua 88,482(72.01%) awmin, Buhfaitham tham ziah chhungkua 1,21,347 (98.76%) an awm bawk. Kohhran Hmeichhe member 2,03,840 an awm a ni.
Kum 2025 atanga 2027 chhunga Central Kohhran Hmeichhe Office Bearer-te chu:
Chairman - Pi K. Vanlalrawni (SEC thlan)
Vice Chairman – Pi Vanlalthlamuani, Dawrpui
General Secretary – Nl. H. Vanlalruati (SEC ruat)
Asst. Secretary - Pi Lalthansangi, Chanmari West
Treasurer - Pi Vanlalhluni, Maubawk
Fin. Secretary - Pi Zohmingliani, ITI Veng te an ni a, an ni bakah hian committee member 36 leh Ex-Officio 5 an awm a ni.